TULSA, MERKA (AP).- Un aparente warwarú a asotá serka di e sentro di siudat na Tulsa i a laga mas di 10 hende heridá entre nan dos ku leshonnan grave i a kousa ku míles di kas no tabatin koriente dañonan grandi na vários negoshi. Te den oranan di mardugá no a reportá niun morto di akuerdo ku e bosero di Tulsa, Kim Meloy. E Kompania di Ambulans a transportá un kantidat di 13 persona pa hospital den e área di kual 8 a keda hañá den restorantnan di TGI Friday’s, 4 den Whataburger i 1 ku tabata den e área. Tabatin vários hende den e área algun ora promé ku e warwarú a tuma lugá. Esaki ta un zona komersial i normalmente tin hopi hende ta bishitá. Tin sentro komersial, sine i restorantnan. Mas di 11.000 hende tabata sin koriente i mas di 3900 a keda te djadumingu sin koriente segun e kompania di servisio públiko na Oklahoma. Servisio Meteorológiko Nashonal a bisa ku informenan preliminar a indiká ku ta trata di un warwarú pero ku ta djaluna na momentu ku spesialistanan terminá nan investigashon tin mas informashon. No ta algu normal ku ta haña warwarú den e temporada aki.
