Business Brainer a sòru pa algun futuro empresario bon formá. Andy Monte i Dianira Saturnino Reenis ta e empresarionan ku a haña formashon i Roxanne Larmonie di Business Brainer a konta kon a hasié. “Bo pèrdè trabou pero no pèrdè speransa i Business Brainer ta komplementá esei”. Business Brainer a keda fundá na 2016 pa Roxanne Larmonie, Danique Zimmerman i Rochelle Monte. Tres dama ku ta traha intensivamente pa duna nan kontribushon na nos komunidat.

 

Roxanne a splika ku Business Brainer ta yuda hende ku  pèrdè trabou pa lanta negoshi, nan ta asesorá negoshinan eksistente ku ke sigui krese i tambe  hendenan poko pega den e proseso i ku ke pa nan negoshi ta eksitoso. Na aprel a kuminda ku Business Brainer Rise & Grind. Na kuminsamentu di aña a kuminsá pensa kiko tei hasi pa yuda e grupo ku ta pèrdiendo trabou. Roxanne, Danique i Roshell huntu a sinta i a yega na e punto ku aktualmente tin un narativo hopi negativo tokante di Kòrsou, hendenan ta pèrdiendo trabou i nan a pensa ku lo ta un bon idea pa hasi un seshon di Business Brainer pa duna nan granito na e kambio di pensamentu ku kos ta bayendo malu. Nan kier a ofresé un trayekto pa duna hendenan ku tin e pensamentu negativo ei i duna nan e posibilidat pa e hende bira un empresario. Nan tabata ke hendenan pashoná pa bira empresario, ku interes, tin hendenan ku tabata kana rònt ku e idea kaba i no sa kon pa ehekut’é i nan ke siña mas. I esei nan a ofresé ku e Buisiness Brainer Rise & Grind. E grupo tabata di 11 hende pero un a kai afó pa sali i e sobra 10 a pasa den henter e trayekto. Nan a kuminsá na aprel i a kaba na ougùstùs. Konsekuentemente awor aki tin 10 hende den komunidat ku un kambio di mentalidat ku ta bai kuminsá ku algu nobo.

 

Mas hende ku a spera…

E kantidat di hende ei ta mas di loke nan a spera. Na kuminsamentu di e kurso 50 hende a apliká pero nan tabatin espasio pa 10 hende so. Awor aki nan ta den evaluashon i pa wak kiko ta bai hasi den futuro ku Business Brainer. Nan ta enfoká riba diferente grupo i esnan ku a pèrdè trabou ta un di nan. Mester wak e 40 hendenan ku nan no a logra hasi algu ku nan, kiko tur por bai hasi ku nan. Mirando e éksito ku e grupo aki, nan tin un push pa sigui pero nan ta dependé di fondonan. E parti finansiero aki ta un di e estorbo pasobra e kurso ya grátis. Ora hende pèrdè trabou ta difísil pa nan paga pa un kurso i nan ta wak kon lo por sigui. Gobièrnu a sostené nan ora nan a kuminsá pero kos tabata difísil na gobièrnu tambe i nan a haña algun finansiadó manera MCB i Post Spaarbank i asina nan por a logra ku e grupo aki. I p’esei lo bai evaluá e kurso huntu ku e spònsernan pa mira si e ta sigui ku e mesun set up òf lo bin kambionan.


“Tools” pa yuda esun ku a pèrdè trabou….

Andy Monte; Andy ta den e proseso pa lanta su empresa. Kaminda e ta trahando aktualmente ta na punto di sera nan portanan. “E kurso tabata hopi bon, na nivel mas di loke mi a spera, Semper mi tabatin idea di negoshi i e kurso ski a yuda mi bon pa pone mi riba e kaminda ku mi ke ta. Mi ta mira yen negoshi ta habri pero despues ta sera. I den e kurso aki bo ta haña e ‘tools’nan pa bo manehá bo negoshi ku éksito. Mi ta trahando aktualmente pero ku chèns pa pèrdè trabou i mi a kuminsá prepará mi mes pa mi hasi negoshi. E ‘tools’nan tur ta yuda bon. Mirando ku tin hopi hende ta pèrdè trabou, mi tambe ta un di nan ku tabata pensa negativo pero mi no kier a para ketu i warda e sla bin i mi a kuminsá prepará mi mes. Bayendo e kurso bo no ta haña e sensashon ku bo ta pèrdè trabou. Bo ta haña sensashon di ta bai kambia di trabou”. Loke Andy ta bezig kuné ta algu ku ta hopi den tópiko awendia. E lo duna pueblo un bon benefisio.

Andy lo kuminsá ku un ‘eenmanszaak’  aki sinku aña ta bira un BV. E ta papia di kresementu i esei ta pone den su plan di negoshi. Pa  e parti finansiero e mes lo invertí i un parti serka bankonan pa e por sigui krese.

 

Negoshi den karga….

Dianira Saturnino Reenis di su banda a bisa lo siguiente ‘Mi a pèrdè trabou aña pasá òktober, kasi un aña pasá i promé ku esei ya mi tabatin idea di lanta mi mes kompania. Den e proseso ei komo mi a pèrdè trabou e plan a kuminsá realisá mas tantu. Den e kareda di òktober pa yanüari te ku aprel nos tabata operá den nos kompania i mi a tuma nota di e kurso aki i a hañ’é bon chèns. Despues di òktober mi a focus mas den e kompania i esaki tabata mi oportunidat pa mi por ta den merkado komo empresario. E no ta algu fásil pasobra bo tin bo mentalidat komo trahadó i ta un kambio kompletamente. Ku e mentalidat di trahadó ei bo ta drenta trahando pa bo mes. E ta un kambio masha grandi mes ku pa persona e ta difísil pa hèndel. Kada bes ora bo ta hasi algu bo tin di wak kon ta hasié. E no tabata fásil pero dushi. Ami gusta kambio i tabata dushi”. Dianira a bai den direkshon di kompania di karga. Den su trabou bieu e tabata logístika mènedjer den e área ei i el a gust’é. El a traha e trabou ei 11 aña largu. Ta basta tempu tabatin hendenan rònt di Dianira ku tabata push’é den e direkshon ei, pero e nunka a hasi kaso, te ku awor.

 

Konfiansa propio…..

E kos mas importante pa Dianira ku Business Brainer a yud’é kuné ta e konfiansa propio. Ora bo pèrdè trabou outomátikamente e negativismo ta lanta. E rutina ku bo tin bo ta mas konfortabel kuné i ora bo pèrdè trabou i bo kai for di bo zona konfortabel, bo ta bira negativo. I loke el a haña mas di Business Brainer ta ku nan ta bai mas profundo. No ta kos ku ta keda ariba ariba i djis hasi pa hasi. Hopi kompania ta kuminsá i sera pasobra nan no a profundisá pa sa kiko nan ke. Nan no a lanta ku bon base i esei Business Brainer ta pone bu riba e base ei pa bo sa pa kiko bo ta para einan. I si ekonomia ta manera awor mes, e push tei pasobra e ta bin di paden pafó.

Andy a bisa ku den e kurso ta haña e parti finansiero, kliente, kontrinkantenan kon atendé ku nan i fásilmente bo no ta bai robes. Bo ta wòrdu motivá ku si bo haña kosnan ku bo a ferwaktu kon pa atendé ku nan. Desishonnan kon tin di tuma nan. Andy a haña e kurso algu grandi.

 

Ekspandé…

Dianira a yega na e punto ku e ke asta kuminsá ekspandé. E intenshon ta ku e lo bai tuma hende den servisio. Su negoshi ta un BV. I e lo konsehá hende pa bai den direkshon di negoshi grandi. E hende por kuminsá kisas chikí pero no limitá nan mes pa negoshi mas grandi. No bula ku ala di manteka, dal paso chikí i poko poko ta sigui krese. Si e hende ta den pèrta, e no benta su soño afó pero dal e pafó pa lanta su mes empresa. No laga e soño ei bai muri, asina Dianira a konsehá. E amor ku bo tin pa bo trabou, otro hende ta wak esei i bo kompania bo mester tin amor pe pasobra esei ta laga bu krese.

 

Profundo…

Roxanne a bisa ku nan ta bai profundo. Esei ta e kos di Business Brainer, nan ta forsa e hende di bai profundo. Nan a ripara ku hende ke kuminsá negoshi i laga otro hende traha nan plan di maneho. Pero Business Brainer ta sòru pa e hende mes traha su mes plan di maneho. Dor di preguntanan ta fòrsa e hende pensa kiko su negoshi ta i ora nan kaba e kontestanan, esei ta forma base pa nan plan di maneho. I esei ta pone ku ora nan bai pidi fiansa un kaminda, ta nan mes a traha nan plan i ta mas fásil pa nan kontestá nan preguntanan.

 

Hasi loke bo ta gusta….

Pa loke ta e tipo di negoshi awendia, Roxanne a bisa ku nan ta lag’é pa e hende mes deskubrí su pashon i su propósito pa e yega na e tipo di negoshi ku e ke habri. Den kaso di Andy i Dianira nan kier a kuminsá algu ku nan tin eksperensia kaba. Pero segun tempu tabata bai por ehèmpel Andy a bin un kambio pasobra e kier a hasi algu ku e ta bon den dje i ta e kos ei e ta gusta. Business Brainer no ta konsehá e hende den kua direkshon e bai. Business Brainer a ripará ku papiando ku hopi hende, tin hopi hende ku ta traha mas di 20 aña den un trabou ku nan no ta sinti nada pe. Pero ta esei nan tin i esei nan ta hasi. I ora nan haña oportunidat di kuminsá pa nan mes, nan ke hasi loke nan a hasi tur tempu. Pero e hende tin di hasi loke e ta gusta. Esun ku hasi un trabou ku e no ta gusta, nunka lo hasié bon. Tin hopi hende no ta felis ku loke nan ta hasiendo. I ku e amor ei, ni maske kiko sosodé eifó, e negoshi ta sigui.

 

LAGA UN KOMENTARIO

Please enter your comment!
Please enter your name here