Jason Obispo
ta bosero pa e proyekto desaroyo di Rif bou di VVRP.

Un proyekto ku sin duda algun lo dun’é realse na un parti di nos sentro di siudat ku tin hopi aña den diskushon ku tei kuminsá desaroy’é. I porfin awor nos por papia ku e trabounan a kuminsá. Sintá bou di un palu, nèt pegá ku e escavator ku tabata trahando kaminda tin un awa sushi, bèrdè, holó stinki i yen di sangura. Nos a bùk pa buska e piskánan den e awa pero nada. Na e sitio ei a kuminsá limpia pa traha kaminda, pa yega realmente kaminda mester yega den e área di Rif.

Meta di e desaroyo di e proyekto di Rif ta ku den aña 2025 Rif ta un área residensial plasentero i seif, ku un grado di atrakshon mas haltu pa hendenan lokal i turistanan di sentro di siudat kultural-históriko. Meta di e proyekto ta ku Rif ta bira un área seif, limpi, salú i mas atraktivo for di un punto di bista turístiko, ku fasilidatnan mehorá pa medio di “upgrade” di infrastruktura i área bèrdè.

Jason a konta nos di Djasabra ku e trabounan ya a kuminsá pa loke ta desaroyo di Rif. Dia 19 di ougùstùs tabatin e Kick-off di e programa pa prensa, kaminda tabatin presentashon den sala di the Movies. Minister Zita Jesus-Leito a hiba palabra na e okashon ei, tambe e sektor direktora  sra. Carolin Manuel a splika di Rif i na final presentashon di Tilly Pikerie ku ta mènedjer di programa. Despues a sigui un rekorido. Gobièrnu a haña importante pa duna miembronan di prensa un bista di e área, konta di e proyekto i p’esei den un Trolly a kore rònt ku henter e grupo pa por mira mas di aserka e área di Rif i kiko e trabounan ta enserá. Awor aki a kuminsá e proseso pa informá komunidat di kiko e trabounan di desaroyo di Rif lo ta.

 

Gravedat…..

Durante di añanan tabatin hopi papiamentu riba desaroyo di e área di Rif, tabata surgi protestanan asina kier a move un dede pa desaroyá e área. I p’esei tabata konsiderá e área aki komo un kaso di gravedat. Jason a splika Djasabra ku hopi hende ku ta trafiká ei banda por sinti  e holó desagradabel ku ta lanta den e área. E awa ta unu sushi ku no tin fluho i no ta bai laman. Tur e fekalia, sushi humano ta bin para ei bou i esei ta lanta holó desagradabel i ta un lugá ideal pa sangura brui. Tin ora por papia di sanguranan estilo Drone, hopi grandi i ta kargadónan di malesa loke no ta bon pa salú di komunidat. El a bisa ku no ta responsabel di parti di gobièrnu pa no hasi nada ku e área ei. I ya ku ta bai hasi algu ku e área, nan ke desaroy’é i hasié un área agradabel pa tur hende por gosa di dje i sigur tambe pa nos turismo.

 

Awor si a kuminsá…..

Awor nos no ta papia mas ku ta bai kuminsá pero awor nos ta papia ku a kuminsá ku e trabounan pa desaroyá área di Rif.  Na 2004 e plan mayó a keda traha i na 2007 aprobá dor di BC e tempu ei. Pero nada no a sosodé for di 15 aña pasa ku a kuminsá ku e plan ni 12 aña pasa ku el a keda aprobá. Na 2018 a disidí ku awor si ta bai kuminsá. Despues di a hasi investigashonnan pa mira si e master plan ta vigente i gobièrnu a ratifiká e plan i awor a kuminsá ku su desaroyo.

Area di Rif su desaroyo ta konsistí di 8 proyekto di kual 5 ta di gobièrnu i 3 ta priva. I Jason ta kere ku ta masha importante pa splika i duna e informashonnan na pueblo pasobra por papia di un malkomprondementu di kiko ta bai tuma lugá.  Ta bon pa splika kiko kada un di e proyektonan ta. Ta importante pa tur hende ta na altura di kiko ta bai tuma lugá i asina kada hende por forma nan propio opinion.

 

Proyektonan….

E promé proyekto i esun prinsipal ta e pòmp i e pipa esta e ‘gemaal’. Tin un pòmp einan ku ta pòmp e awa sushi di sushi humano i ta mand’é pa e pipa ku ta bai Klein Hofje. Sinembargo tin un desague ta tuma lugá den e awa na Rif. I e awa ei no tin fluho i ta keda einan pará i ta okashoná e holó desagradabel i lugá di brui pa sangura. I tin awa di glor ku tambe ta bai kaba einan i e ta forma un stof ku no ta bon pa salu di niun hende. E palunan di mangel einan ta kontaminá dor di e awa ei. I p’esei mester mishi un ratu na e palunan di mangel. Mester yega na e tereno ku ta bai saneá. E pipa ei ta bai keda alargá i ta hiba Klein Hofje i asina ta haña espasio pa saneá e área ei. E proyekto ta unu basta grandi i p’esei esun prinsipal.

Di dos proyekto ta kaminda e trabounan a kuminsá awor aki ku ta bai bin un parke di Palu di Mangel.  Lo bin 2 parke di palu di mangel di kual unu kaminda e trabounan a kuminsá, tambe lo haña un sentro di informashon pa bishitantenan ku lo duna tur klase di informashon relashoná ku palu di mangel i historia di Rif kompleto. Hóbennan por bai hasi eskurshon einan i haña tur informashon pa skol. ta un área bèrdè grandi, dinámiko, vibrante i sigur un parke interesante.

 

E di tres proyekto ta e parke di mangel 2 mas den serkania di Isla bèrdè. Kon e lo bin no sa ainda pero e ta aprobá kaba pa un di dos parke.

E di kuater proyekto ta un kanal di konekshon di palu di mangel un pa esun 2 i einan lo bin un kanal di awa limpi i e sistema ekológiko rebibá, ku piska den dje i ku kanoa por kore di un parke bai e otro.

E di sinku proyekto ku ta kai bou di gobièrnu ta e kaminda ku ta kore di e rotònde i bai e terminal krusero. Ta un kaminda pa outo, peaton i ku banki pa sinta i den una área limpi, salú i bèrdè.

Proyektonan privá…

Banda di e proyektonan di gobièrnu tin 3 proyekto privá. Un di nan ta konstrukshon di hotèl Corendon (periodo di 2019-2021). E promé parti lo habri na aprel 2020 ku 500 kamber. E di dos fase ta 300 i algu di kamber. Total algu mas ku 800 kamber, hotèl ‘all inclusive’. I ku un invershon di 127 mion.

E di dos proyekto privá ta e Courtyard Marriott (2020- 2022). Ta netamente kaminda a sera e tereno aktualmente i awor si e konstrukshon lo bai kuminsá. Ta netamente e área kaminda tabata usa pa parker outo.  E invershon total ta di 58 mion florin.

E di tres proyekto ta renovashon di Renaissance Hotel. Renobashonnan a kuminsá kaba i nan lo kaba e aña aki mes ku un invershon di 30 mion florin.

 

Ekonomia….

Jason Obispo a bisa ku ta hopi proyekto ku ta bai kontribuí na nos ekonomia, turismo i nos salú, Un área salú i vibrante. I a envolví tur organisashon den Otrobanda. Den e plan mayó di 2004 ya e partidonan tabata envolví i awor ta tene nan tur na altura i bon informá di e status i e pasonan ku ta sigui dal. I miéntras e desaroyo ta kanando, tin algun kos mas ku ta bin aserka manera Stadion di Rif i tambe e pisina Benny Leito ku lo bai keda renová. Tur esaki teniendo na kuenta ku nan tur ta forma parti di un área turístiko.

 

Aki dos aña, algu nobo….

Si tur kos kana segun plan pa aki dos aña nos tin un área di Rif kompleto desaroyá. I ya por kuminsá mira e trabounan kanando. Ta kobando pa yega na e área di sanashon i for di mei mei di otro aña por mira e kambionan mas grandi. Henter e programa di 2 aña ta entre 20 pa 25 mion. Esaki ta e parti di gobièrnu so sin konta e invershon di e otro 3 proyektonan.

Kambio i desaroyo por trese resistensia pero nan tin atenshon i tin plan di komunikashon pa konvensé e komunidat di kon grave e situashon ta i ku mester hasi algu pa sania e área. I p’esei nan tin un página di Facebook kaminda por sigui kada paso di e desaroyo. Tambe nan ta riba Instagram pa por sigui kiko ta sosodiendo pa loke ta desaroyo di Rif.

LAGA UN KOMENTARIO

Please enter your comment!
Please enter your name here