Laurella Martis, presidente di Baden Powell Toastmasters Club
E importansia di forma parti di un klup manera Baden Powell Toastmasters Club ta e punto di atenshon ku nos a papia riba dje den e programa di Djasabra di awe. E loke nos ta presentá den korant akí tambe lo ta riba nos plataforma digital kaminda por mira e entrevista. Laurella Martis a kaba di asumí presidensia di Baden Powell Toastmasters Club. El a papia riba e vishon i programa ku ta trahando ariba entre otro e enkuentro di otro siman dia 4 di ougùstùs.
Forma lidernan
Toastmasters ta e plataforma kaminda ta forma lidernan i e parti di komunikashon. E persona ta desaroyá su mes riba e parti di liderazgo i komunikashon. Tin hende, sa tin biaha, tin miedu di papia dilanti di públiko. I den un ambiente familiar nan ta sigui desaroyá nan mes. E vishon di e aña akí ta kon krese tresiendo kosnan den balansa. “Hopi bia bo tin hopi kos ta hasi pero bo parti sosial, bo parti di desaroyá bo mes komo persona i ser mihó persona tambe mester ta den balansa. I esei ta nos vishon di Baden Powel pa aña 2026 – 2027.
Yuda e persona desaroyá
Di tur e añanan ku Laurella ta den Toastmasters el a eksperensiá e desaroyo di komunikashon masha dushi. Dimes kada hende tin nan sistema di komuniká i hasié. El a eksperensiá un persona ku no tabata sa nada di e parti sosial i teniendo na kuenta ku kada hende tin su abilidatnan, el a nota ku e persona, kada aña, sa kon presentá su mes, desaroyá e parti di presentá i traha foyeto. Tambe otro hóben ku a sa di krese i te awe e ta den parlamentu. Laurella a menshoná un hóben ku a desaroyá su mes. E tabata den diferente organisashon pero ku Toastmasters e ta rekonosé di a yud’é krese komo persona. I no ta papia di un persona di edat, pero un hóben. Einan, segun Laurella, por wak ku Toastmasters ta yuda for di e hóben di 18 aña te hende grandi di 80 aña pa desaroyá su mes.
Pathways
Toastmasters ta habrí pa e persona for di su 18 aña te ku 80 aña i si e tin 90 aña i ainda ke ta den e klup, esei ta posibel, basta e persona tin e abilidat di ke sigui krese. Den e klup, e presidente a bisa ku nan tin e sistema di Pathways. Ta trata aki di un plataforma digital via di Toastmasters International ku ta dividí den 5 nivel.
E persona hopi bia tin miedu di presentá i p’esei ta traha kuné di e siguiente manera:
E promé nivel ta siña e persona kon kibra e eis; e tin di para dilanti di públiko i Toastmasters ta yuda e persona i apoy’é. Tambe tin un mèntòr pa gui’é. Den e promé nivel ta siña papia, desaroyá, presentá i wak e lenguahe korporal.
E di dos nivel ta kaminda e persona ta siña kon drai rònt di su komunikashon i e parti di liderazgo; kada hende tin su estilo i e lo siña desaroyá e estilo ei.
I asina ku kada paso e hende ta kuminsá haña mas konfiansa den su mes. E mèntòr ta yuda e persona, gui’é kiko el a hasi bon i malu. Den e reunion por haña diskurso prepará, otro kaminda ta hasi e hende un pregunta i e ta papia riba e tema ei, i e parti mas importante ta evaluashon. Evaluashon pa Laurella ta esun di mas importante pasobra einan un hende ta krese i e lo haña sa kiko e tin di traha riba dje, e ta sa kiko el a hasi bon i ménos bon i ta evaluá e hende di forma konstruktivo. Esei, segun Laurella, ta Toastmasters. E ta siña e hende estilo ‘sandwich’, esta ménos bon, un tiki bon i kiko tin di mehorá pa e siguiente bia.
Gavel Club
Lamentablemente, segun Laurella, hopi bia e hóben no ta asina interesá pa forma parti di e klup. Awor akí nan tin hendenan di 30 aña bai ariba pero nan ta purba haña mas tantu hóben pasobra un hóben ku desaroyá for di trempan ta lanta kuné i ta mihó p’é. I p’esei den nan e aña aki ke lanta un Gavel club, esta, pa hóbennan for di 12 aña, ya asina por hinka esaki den e hóben pa e desaroyá su mes, lanta kuné sin miedu i sa kon ekspresá su mes. Toastmaster no ta nifiká para dilanti di públiko so, pero e por ta den famia, den kòmbersashon di dos persona i hopi mas. Ora ke praktiká, nan ta konsehá e persona pa e sinta dilanti di famia i praktiká. E motibu dikon ta kuminsá ku e klup di 12 aña ta pa logra haña hóbennan pa tin konfiansa den nan mes. E hóben ei hopi bia tin di traha riba diskursonan, ‘spreekbeurt’ dilanti di klas pero e yùfrou hopi bia no tin e tempu pa bai duna tep na kada mucha den klas. I p’esei, si un hóben kuminsá hasié for di yòn, esaki por yud’é sigui desaroyá i p’e bira un hóben komo miembro di Toastmasters.
Lo drenta skol
Teniendo na kuenta e atenshon ku ta poniendo na e hóbennan, Laurella a bisa ku último ei nan tabata na e plan di fakansi di SDK, kaminda a yuda e hóben ku por ehèmpel algu masha simpel ku ta para dilanti di públiko, despues kon wak e públiko ora ta papia kuné, kon usa bos, no grita ni papia muchu poko poko. Ta siña e hóben saka su bos i asina tiki tiki e ta haña e konfiansa pa hasié mihó. E hóbennan einan a wak e importansia i nan di Toastmasters a haña bon reakshon. I p’esei ta importante pa nan lanta e Gavel Club i asina kontagiá otro hóbennan. Den e kuadro aki tambe, segun Laurella, den nan plannan próksimamente lo bai drenta skolnan. Un grupo di Toastmasters a haña e o.k. pa por drenta skolnan. Esei tambe ta importante pa por siña e hóbennan.
Enkuentro 4 di ougùstùs
Dia 4 di ougùstùs Baden Powell Toastmasters tin su promé reunion ku ta bai ranka sali pa 7or di anochi na JCC. Lo tin un orador invitá, Branton “Payo” Balentien, ku lo bin pa kontagiá tur hende. Tur aña ta pone un tema i asina kuminsá e hornada nobo. Payo lo bai duna e hendenan e motivashon pa kuminsá ku un bon vibra. Nan a ripará ku na momentu ku pone un orador invitá, ta haña mas públiko ta bin. I p’esei e aña akí, den kuadro di e’ Blue Wave’, a invitá Payo Balentien. E reunion ta na JCC i ta kuminsá 7or enpunto pa e kaba na ora tambe. Tur hende por bin, pero si por, yama promé na 5137250 i asina duna nòmber pa por t’ei. Lo tin e orador invitá pero tambe lo bai instalá dos miembro nobo i tin e parti sosial tambe. Tambe lo tin e parti di evaluashon pa sa kiko a bai bon i ménos bon.
No tin eksigensia
Pa bira miembro di Toastmasters club ta masha fásil. Hopi bia ta bisa e persona ku e por bishitá nan enkuentronan algun bia i despues bira miembro. Pero tin hende for di e promé biaha ke bira miembro. E no ta mará na niun eksigensia ni rekisito pa permití un hende bira miembro. E hende mester tin smak di sigui desaroyá su mes i nan semper ta bon biní. Tur hende ta bon biní, basta sa e meta. Tin un profeshonal por bin i pone ku nan ke keda 1 aña so pero tin miembronan di mas di 30 aña i tur bia ta siña algu i por pasa eksperensia over.
Mas tantu hende muhé
Baden Powell Toastmasters Club ta konsistí mas tantu di hende muhé. Pero, segun Laurella, nan ke haña mas hende hòmber tambe interesá pa forma parti di e klup. Hopi bia hende muhé ta tur kaminda pero e hòmber mester sosten’é. E hende muhé tin mas kurashi kisas miéntras e hende hòmber hopi bia su esküs ta ku e tin yen kos di hasi. I p’esei ta haña mas hende muhé interesá pa forma parti.
Duna bèk na komunidat
E klup ta duna bèk na komunidat. Segun e presidente, e último bia nan a hasi un proyekto kaminda Baden Powell Toastmasters Club, huntu ku koordinadónan di e proyekto Toastmaster Alice Loos i Zoraida Pisas-Adelaida, a organisá un Sip & Paint pa e skoutnan i lidernan di grupo Skout Nafasi, kaminda nan por a ekspresá nan kreatividat riba ‘canvas’. Grupo Scout Nafasi ta un grupo di skout ku tin un limitashon pero ku ta aktivo riba e tereno di ‘skouting’. E grupo akí ta reuní tur djasabra na Emmastad, sede di Cariben, i ta hasi diferente aktividat.
Koordinadónan, huntu ku e tim di boluntarionan di Baden Powell Toastmasters Club, a organisá un tremendo dia di Sip & Paint pa e grupo kombiná ku aktividat di moveshon. Durante e Sip & Paint e skoutnan por a pinta loke nan tabatin den nan mente pa pone riba e ‘canvas’. E diferente skoutnan a hasi uso di pintura pa nan por a ekspresá nan mes, nan tabata artistanan pa e dia aki. Nan a proyektá diferente pintura ku ta simbolisá amor, komprenshon pa otro i naturalesa.
Baden Powell Toastmasters Club ta kere den duna bèk na komunidat i a hasi uso di e oportunidat ku e kuríkulo di Toastmasters ta duna pa hasi e proyekto aki. E proyekto akí a sali for di Toastmaster Alice Loos ku a hasi uso dje proyekto “Present a proposal” pa yega na un proposishon, aunke na promé instante el a hasi esaki solamente komo un proposishon pa un proyekto fiktisio kumpliendo ku tur ophetivo den e presentashon. Su presentashon tabata asina real ku al final miembronan tabata asina entusiasmá te a disidí di djòin pa hasi esaki posibel. Di esaki otro a keda inspirá. Toastmaster Zoraida Pisas-Adelaida a hasi uso dje proyekto “Manage your projects successfully” pa ehekutá e proyekto proponé ku a resultá den un evento eksitoso djasabra último. Aki nos por mira kon e kuríkulo di Toastmasters ta siña bo prepará, presentá un proposishon i kon pa ehekutá esaki ku éksito. Na final dje mainta a evaluá di un manera kreativo ku e skout i lidernan i por mira bèk riba un dia artístiko kaminda skout i lidernan a disfrutá di dje.
102 aña Toastmasters International
Tur Toastmasters di Kòrsou ta forma parti di Toastmasters International ku e aña aki ta kumpli 102 aña. Einan por wak ku e plataforma ta unu rekonosé mundialmente. Na Kòrsou tin 17 klup i e aña akí nan ke ta mas visibel pa asina nan por ta e mihó vershon di nan mes. Baden Powell mes ta kumpli 9 aña dia 30 di sèptèmber. Ta un klup basta yòn ku 20 miembro aunke sa bin miembronan di afó. Nan lo ke mas miembro pasobra tur tin un meta i nan por pèrdè miembro ku ta sigui desaroyá i bai. Por ehèmpel 2 aña pasá nan tabatin un mucha hòmber di 18 aña ku a kaba VWO i e kier a keda 1 aña den e klup promé e bai afó e siguiente aña. Ei por mira ku ta pèrdè un hende i nan tin di traha pa yena e parti ei. P’esei e aña akí lo bai organisá un Speech Craft ku ta un seshon di 4 reunion kaminda e persona tambe ta sigui desaroyá. E ta bin pa sa kon ta praktiká i kada reunion ta trese un diskurso di 2 pa 3 minüt. E persona mes ta pone su tema pa e bin papia riba dje.
Direktiva nobo
Direktiva di Toastmaster ta sinta nèt un aña pasobra ta duna oportunidat pa otro krese.
Resientemente Baden Powell Toastmasters Club a instalá su direktiva nobo pa aña 2026-2027, miembro nobo i tambe rekonosé miembronan ku a destaká den aña 2025-2026.
E direktiva di Baden Powell Toastmasters Club di aña 2026 – 2027 ta konsistí di:
Presidente – Laurella Martis DTM
Vise Presidente Edukashon – Lorna Fraai-Browne
Vise Presidente Miembresia – Francis Angelica DTM
Vice Presidente Relashonista Públiko – Regis Loo
Sekretaria – Tamari Brunken
Tesorero – Zoraida Pisas-Adelaida
Sargento di Evento – Junilda Manuela-Cicilia
Presidente saliente – Lorna Fraai-Browne
