WILLEMSTAD.- Den diferente hospitalnan Hulandes, inkluí esun na Rotterdam, Utrecht, Amsterdam, Maastricht, i Nijmegen, i tambe na Kòrsou, trahadónan di kuido lo tene seshon di konmemorashon dia 7 di yanüari pa konmemorá nan koleganan na Gaza. Segun Nashon Uní, for di òktober 2023 mas ku 1000 trahadó di kuido Palestina a pèrdè nan bida. E aktividatnan di konmemorashon ta un inisiativa di ‘Dòkter pa Gaza’, un kolektivo di kuidadónan den Reino Hulandes ku ta traha pa protehá kuido den e área di konflikto.

Den kasi tur hospitalnan akadémiko na Hulanda i na hospital prinsipal di Kòrsou lo tene seshonnan di konmemorashon mesora dia 7 di yanüari. Na nos isla, e aktividat lo tuma lugá di 7:30 pa 8:00 di mainta. E seshon ta sigui despues di e ataká di 27 di desèmber 2024 riba Kamal Adwan hospital p[a mucha, e último hospital ku tabata operá na nòrt di Gaza.

Den e área aki tabatin anterior 22 hospitalnan operando, pero tur esakinan a sali for di operashon. “Dòkternan a hasi un huramentu pa aliviá sufrimentu humano. Nos no por neglishá e sufrimentu di e hende na Gaza i mester hasi tur kos posibel pa yudá nan,” ta bisa Nouaf Ajubi, nefrologo na Kòrsou.

LAGA UN KOMENTARIO

Please enter your comment!
Please enter your name here