Minister Boekhoudt: CMC ta haña suma supstansial èkstra pero Parlamento mester aprob’é
WILLEMSTAD.- Trahadónan di hospital CMC a respondé na e yamada di sindikato CBV awe mainta, pa asistí na un reunion bou di ora di trabou. Presidente di CBV sra. Mathilda a splika e trahadónan di e importansia pa atendé e kontrato kolektivo. El a enfatisá ku ta sindikato so ta wak bienestar di trahadó. E miembronan di forma kontundente a bisa ku nan ke mehorashon di nan salario. Tambe el a pidi trahadónan pa no brua negosiashon pa asuntunan ku awor aki no tin e prioridat máksimo. Mester negoshá konsiente!
Minister di GMN Tyrone Boekhoudt tambe tabata presente i a papia ku e trahadónan di CMC. E mandatario a duna di konosé ku gobièrnu a bai di akuerdo ku un presupuesto pa CMC ku ta enserá un suma kuantioso èkstra. Parlamento mester aprobá esaki ainda si. Ora esei sosodé, hospital CMC lo haña entrante 2027 un suma konsiderabel adishonal. Mas detaye den edishon di EXTRA.
