Trahadónan di Girobank ke sa kiko ta bai para di nan den futuro

File foto

Insertidumbre kresiente

WILLEMSTAD. – Ainda trahadónan di Girobank ta den un insertidumbre grandi relashoná ku nan futuro empleo. No ta dunando trahadónan informashon di kiko ta bai pasa ku e banko i nan komo empleado miéntras ku den medionan di komunikashon ta lesa i tende tur dia un otro informashon relashoná ku e situashon ku Girobank ta aden.

Loke ku e trahadónan mes ta kere ku ta bai pasa ta ku APC Bank, e banko nobo di fondo di penshun APC lo tuma e portofolio di fiansanan saludabel di Girobank. Girobank mes lo keda redusí te na un aktividat mínimo di atendé ku e fiansanan ku no ta saludabel.

Pa e trabou aki mester di un kantidat mínimo di trahadó. Den e kuadro aki e trahadónan di Girobank ta pèrdiendo pasenshi, pasobra no ta tende nada di un akuerdo final pa APC Bank kuminsá operá. Tampoko tin klaridat kuantu di e trahadónan aki ta haña empleo na APC Bank.

Informashon no ofisial ku ta sirkulá bou di e trahadónan ta indiká ku ta ‘sierto’ trahadó di Girobank so APC bank ta interesá pa tuma den servisio. Pero eksaktamente kuantu di e empleadonan te ainda no ta konosí. Den pasado a puntra informashon di sierto trahadó pa evaluá si ta ofresé nan trabou na APC Bank, pero e trahadónan no a tende nada mas di e intenshonnan aki.

Entretantu klientenan di Girobank tambe ta pèrdè pasenshi. Promé minister Eugene Rhuggenaath ta bisa ku den e fushon entre Girobank i APC Bank tur kliente tin garantia di haña disposishon di e suma kompletu ku nan tin depositá na Girobank.

Sinembargo klientenan no por spera di haña disposishon di tur nan sèn den un tiru. E intenshon ta ku ta haña disposishon di 35 porshento di e suma ku ta di fris na e banko na momento ku APC Bank bira operashonal i tuma sierto aktividat i klientenan di Girobank. Despues den fase lo sigui haña disposishon riba sobrá di nan sèn.

Den kuantu fase esaki lo tuma lugá no ta konosí. Entretantu e klientenan manera fundashonnan i kompanianan ketu bai ta sinta ku problema pa kumpli ku pago i aktividatnan ku normalmente nan ta hasi pasobra nan no por yega na nan sèn.

 

SHARE

LEAVE A REPLY