BOGOTA, COLOMBIA, AFP.- Un grupo di trahadó di salú a manifestá den un protesta simbóliko riba e plasa sentral di Bogotá, kontra e forma kon e gobièrnu kolombiano ta manehando e pandemia kontra COVID-19.
E manifestantenan a pone 156 stul blanku ku ta representá e kantidat di trahadónan di salú ku e muri kombatiendo e vírus na Colombia, kual a infektá mas di un mion persona i mata 30.154 hende te ku djasabra.
E manifestantenan a pone un sinta pretu, un rosa i un papel ku nòmber, edat, profeshon i fecha di fayesimentu di nan koleganan ku a muri di COVID-19.
“Esaki ta un homenahe na tur trahadó di salú ku a muri durante e pandemia. Por a evitá e mortonan si nan tabatin sufisiente elemento di protekshon personal na nan disposishon. Ademas, nos ta manifestá kontra e forma kon gobièrnu a atendé ku e pandemia”, segun indikashon di dòkter Herman Bayona, presidente di Kolegio Médiko di Bogotá. Bayona a akusá ku e gobièrnu a priorisá ekonomia, i no e pueblo su derechi di salú i bida.