Trahadónan Sta. Barbara di shòk ku retiro masal

…Trahadónan di Sta. Barbara Resort den reunion ku Sentral Solidaridat ayera na BTG…

WILLEMSTAD.- Trahadónan di Santa Barbara Beach & Golf Resort a keda di shòk ku karta di retiro despues ku e doño di trabou a duna nan karta positivo dje hotèl i hasta ku den luna di yüli lo habri pa lokalnan so.
Den deklarashon pa EXTRA presidente di Sentral Solidaridat Sindikal sr. Frensley Sille a bisa ku ta for di djaluna trahadónan di Sta. Barbara a aserká nan di Sentral Solidaridat Sindikal pa ku e situashon ku a presentá kaminda nan doño di trabou a pidi nan retiro.
Dies trahadó ku a yega serka e Sentral, djamars a sinta ku nan i a palabrá ku ayera djárason Chi Provence ku tabata laborá na SOAW lo tei pa splika trahadónan nan derechonan. P’esei a yama un reunion general.
E reunion di ayera a bai bon, segun Sille. A bin hopi kos dilanti. E trahadónan a skucha e mensahe, nan a hasi pregunta i a trese nan parti di disgustu i abusu ku ta tuma lugá, trahadónan ta traha 30 ora, traha riba ‘nul’ kontrato etc.
Despues di e reunion di ayera, Sentral Solidaridat a reuní ku e grupo di 10, i a palabrá e siguiente stap.
Awe tardi lo tin reunion ku sr. Dois Gijsbertha i inspekshon di labor, kaminda ta trese e parti di abusu dilanti. Ta buskando kontakto ku minister Steven Martina di MEO pa reuní riba inkietut dje trahadónan i awe lo manda mail pa doñonan di Sta. Barbara Resort pa haña un reunion ku nan.
Mas aleu sr. Sille a splika ku ora ta trata di retiro via di SOAW, ta e doño di trabou tin di paga trahadónan sesantia. Tanten ku SOAW no kaba ku e petishon, e trahadónan ta den servisio di Sta. Barbara. Trahadónan por duna opheshon tambe. Henter e proseso aki ta dura 6 siman. Pues Sta. Barbara tin di paga trahadónan normal.
Trahadónan a keda babuká kon bon e hotèl tabata drei, i nan mes kon nan tabata traha pa duna servisio. Den e karta ku nan a haña dje doño di trabou algun siman promé, ta bisa nan kon bon nan ta traha, i ku pa despues di yüli lo habri pa lokal, i tambe nan doño trabou bisa lo tuma NOW, i awor a bin karta di retiro. Esei no a kai den bon tera serka nan. Trahadónan ke nan kupo di trabou.
Djaluna último Sta. Barbara Resort den un karta a anunsiá su siere pa 12-18 luna. Dor di esei e hotèl a apelá pa retiro masal serka Ministerio di Labor”.
Tambe e hotèl ta papia di reto finansiero ku nan tabata konfrontando kuné for di apertura dje hotèl 10 aña pasa, i awor ku COVID a empeorá e situashon dje hotèl mas i mas.

SHARE

LEAVE A REPLY