Proseso habrí pues Chonky tambe por solisitá

WILLEMSTAD.-E trámitenan a kuminsá kana pa yega na un direktor fiho pa e kompania anónimo di gobièrnu di Kòrsou, Refineria di Kòrsou (RdK). Un aviso den algun medio di komunikashon ta duna tur e rekisitonan ku e kandidatonan mester tin pa asina nan por bini na remarke pa partisipá den e ‘kontienda’. E último direktor fiho ku RdK a konosé tabata Roderick van Kwartel, kende manera ta konosí a hañ’e den problema ku hustisia na momentu di buska operadó nobo pa e refineria na Kòrsou. Promé ku van Kwartel tabatin Jose van de Wal Arneman komo direktor statutario di RdK.

Marcelino de Lannoy Direktor interino di Refineria di Kòrsou
…Eks direktor di Refineria di Kòrsou, Roderick van Kwartel…

Despues di e kaso ku e eks direktor a nombra e aktual gerente, Marcelino ‘Chonky’ de Lannoy komo direktor interino. E momentunan aki RdK ta na bista di hinter komunidat relashoná ku buskamentu di operadó pa e refineria i tambe e diskushon ku sindikatonan riba futuro di trahadónan tantu di e refineria komo esnan di kontratista. EXTRA a puntra si e proseso ku a start ta pa formalisá e puesto di direktor òf realmente ta bai buska un direktor nobo. Den kombersashon ku premier Eugene Rhuggenaath el a splika EXTRA ku tur hende por solisitá pasobra ta trata di un proseso di solisitut habrí, pues inkluso Chonky de Lannoy tambe por solisitá. Punto ta ku mester skohe e mihó persona pa e funshon.

Mas aleu premier a duna di konosé ku un funshon interino semper ta keda algu temporal. Ademas konforme ‘code corporate governance’ mester tin transparensia i un proseso habrí den nombramentu di direktornan den NV i fundashonnan. Esaki ta konta pa RdK tambe, pues no ta importá kon bon Chonky a funshoná òf ku premier a traha kuné den pasado, niun di eseinan no ta konta.

LAGA UN KOMENTARIO

Please enter your comment!
Please enter your name here