WILLEMSTAD.- Durante luna di mei 2021 Banko Sentral a opta pa mantené e porsentahe di reserva obligatorio na 19%. No opstante esaki e montante di reservanan obligatorio a baha tòg ku 61.0 mion dor di un bahada di base riba kua ta kalkulá esaki. Durante e bena semanal di Sertifikadonan di Depósito e bankonan a inskribí solamente pa e sumanan ku ta kaduká na sertifikado. Dor di esaki e montante di sertifikadonan pendiente a keda igual. Asina Banko Sentral ta bisa den su relato.
E kantidat di plaka básiko a subi ku 99.9 mion florin dor di un subida di e plakanan riba kuenta koriente di bankonan komersial (95.7 mion florin) i di e plakanan di papel i monedanan den sirkulashon (4.2 mion florin). E subida dje plakanan riba kuenta koriente tabata prinsipalmente resultado di un bahada dje reserva obligatorio i e transakshonnan di gobièrnu di St. Maarten i fondonan di penshun di nan kuentanan na Banko Sentral pa nan kuentanan serka bankonan komersial. Tambe e transferensia di Gi-Ro Settlement Holding pa Girobank NV en konekshon ku terminashon dje entidat aki a kontribuí na e subida dje plakanan riba kuenta koriente.
E pòst di “Obligashon na no-residentenan” a subi ku 7.9 mion, ku a surgi prinsipalmente dor di transakshonnan di bankonan komersial na Boneiru pa nan kuentanan serka Banko Sentral. E subida dje pòst a keda suavisá dor di pagonan hasí dor di Ministerio di Finansa di Hulanda pa APC i Fondo di Penshun St. Maarten (APS) en konekshon ku fiansanan di anuidat ku den kuadro di e saniamentu di debe dor di Estado Hulandes a ser tumá over i ku a den portafolio dje entidatnan aki.
Mas aleu e relato ta bisa ku, e posishon neto di gobièrnunan serka Banko Sentral a empeorá ku 2.7 mion dor di un bahada di depósitonan di parti di St. Maarten (5.3 mion), moderá dor di un subida dje depósitonan di Kòrsou (2.6 mion). E bahada dje depósitonan di St. Maarten tabatin di aber ku transakshon pa kuentanan serka bankonan komersial en konekshon ku dunamentu di e ayudo di sosten pa e gruponan ku mas a keda afektá den komunidat. Tambe e pagonan di interes riba bononan ku ta den man di Estado Hulandes a kontribuí na e bahada dje depósitonan di St. Maarten.
