WILLEMSTAD.- Un disputa ku a surgi entre di un agensia di outo aki na Kòrsou i un agensia marítimo, ta resultá den korte despues ku e agensia di outo a laga pone beslag riba kuentanan di e agensia marítimo, na un banko komersial lokal, pa un suma di 61.971 florin, na nan opinion, suma ku a bin riba e faktura ku no ta hustifiká.

Tur kos a kuminsá ora ku e agensia di outo a pidi algun agensia marítimo un oferta pa trese 210 outo den 70 kònteiner for di Shanghai pa Kòrsou. Un di e agensianan a reakshoná mesora i a duna un oferta di e kompania di barku CMA-CGM ku ta ofresé 4.300 dòler pa kònteiner inkluso BAF i DTHC, e último ta para pa “Destination Terminal Handling Charges”. E agensia di outo a bai di akuerdo ku e oferta aki.

Despues di tempu e 210 outonan a yega Kòrsou for di Shanghai den 70 kònteiner. Pero e faktura ku e agensia di outo a haña pa paga ta figurá un  suma di 61.971 florin pa DTHC, loke ku den e oferta ta menshoná ku e preis di 4.300 dòler ta inkluso DTHC.

No a dura mashá ku e agensia di outo a laga pone beslag riba kuenta bankario di e agensia marítimo, p’asina garantisá e echo ku e suma di 61.971 dòler ta keda einan te ora ku kaba ku e disputa. Pa  motibu ku e agensia di outo ta di opinion ku e agensia marítimo a faya den nan obligashon pa intermediá.

E agensia marítimo ku no ta di mesun opinion a start un proseso hudisial kontra di e agensia di outo pa lanta e beslag, pa motibu ku e agensia marítimo ta bisa nan no ta responsabel pa e faktura. Nan a intermediá, pero no a sera e kontrato di transporte di e outonan, esei a bai entre e agensia di outo lokal, esun di China i e kompania di barku.

E echo ku e agensia di outo aki na Kòrsou tabatin urgensia pa saka e outonan, el a paga e suma, sino ta bin otro gastunan si e karga no haña outorisashon pa sali.

Korte ta konkluí ku e fayo no por keda poné riba e agensia marítimo i esaki ta pone ku Korte a lanta e beslag ku e agensia di outo a laga pone.

 

LAGA UN KOMENTARIO

Please enter your comment!
Please enter your name here