NEW DELHI, AP.- Un trein ku velosidat haltu a dal por lo ménos 58 persona ku tabata selebrando un fiesta religioso na nort di India djabièrnè. Asina e funshonario di Partido di Kongreso a informá.
Pratap Singh Bajwa a bisa ku e víktimanan tabata opservando vürwèrk debí na un festival religioso na momentu ku e trein a pasa i dal nan pafó di Amritsar, den estado di Punjab.
El a agregá ku e víktimanan no a mira e trein, kual bo a stòp despues di e insidente tampoko.
E festival hindú tabata esun Dussehra, kaminda ta kima e supuesto demoño Ravana. E multitut tabata kontemplando e seremonia na momentu ku e trein a pasa.
Despues di e suseso, vários persona den e pueblo a kore na e sitio i a kondena outoridat di riel pa no tuma e prekoushonnan nesesario.
Aksidente ku trein na India ta komun. Pero esun di djabièrnè tabata un di e aksidentenan mas mortal den añanan resien.
Na aña 2016, 146 persona a muri debí ku un trein a sali di riel na parti ost di India.
