HOB OKEN, NEW JERSEY, MERKA, AP. – Investigadornan federal a konsiderá ku un trein di pasahero tabata desplasá ku un velosidat di dos pa tres biaha mas haltu ku e límite permití di 10 kilometer pa ora na momentu ku el a dal den un terminal di riel na New Jersey siman pasá. Asina un funshonario a informá na The Associated Press.
Segun e funshonario, kende a wòrdu informá tokante e investigashon, investigadornan ta kalkulá ku e trein tabatin un velosidat di entre 32 i 48 kilometer pa ora na momentu ku el a dal kontra un terminal na Hoboken djaweps último. E kalkulo ta basá riba e magnitut di daño, no datonan di instrumento di e trein.
E funshonario a papia ku AP bou di kondishon pa keda anónimo.
Un muhé na e sitio a fayesé debí ku e trein aki a basha e dak abou. Un sentenar di persona a resultá heridá.
E makinista, Thomas Gallagher a bisa investigadornan ku e no ta kòrda muchu di e aksidente, pero ku e tabatin un velosidat di 16 kilometer pa ora na momentu ku e tabata aserkando e stashon.
Gallagher di 48 aña, a bisa ku e ta kòrda solamente kon el a lanta for di riba suela di e kabina di makinista.
Den próksimo oranan un informe nobo riba e investigashon aki mester a sali.
Investigadornan ta purbando di haña e segundo di e dos grabadornan di dato. E ruinanan ta impedí akseso na e artefakto, dilanti di e trein i video di kámara dilanti.
Un otro grabador di dato, instalá den parti patras di e trein, no tabata funshoná riba dia di e aksidente.
