Dr. Charles Edwards a traha 26 aña na Merka i despues a disidí na 2008 pa bin su pais pa duna su kontribushon. Na Merka el a traha komo spesialista pero tambe duna lès na spesialistanan.  El a bin Kòrsou, ku su kasá ku tambe ta dòkter/spesialista.  Aktualmente e ta establesé na Kòrsou pero ta ku regularidat na Merka.

 

Dr. Charles Edwards a kuminsá den wikènt ku a pasa ku un téknika nobo ku yama Renuvion J Plasma. E ta bira e úniko dòkter den Karibe ku tin e aparato pa praktiká e téknika, di trèk kueru aki. El a splika nos ku ta e último i mihó teknologia pa hasi e kueru mas strak, despues di ‘liposuction òf liposculpture’  i usa e J Plasma aserka. Por us’é den vários parti di kurpa; barika, lomba, sintura, brasa, pia, garganta, kara. En bes di hasi un ‘facelifting’ ta hasi un J Plasma ku ta hasi e kueru strak. Pashèntnan ku ploi den kueru i ku man i pianan slap por hasi e kueru strak ku e téknika aki.

 

Ta un operashon

Ta un instrumento ku ta usa koriente i radio frekuensia kombiná ku gas di helium. Ora aktivá e koriente, e gas ta forma un plasma i e kayente ku e ta produsí, ta hasi e kueru mas strak, sin hasi daño na e otro partinan i ménos na e kueru.  Otro teknologianan den pasado manera laser ta bira muchu kayente i ta kima e kueru. ‘Esaki ta algu ultra moderno i nos ta e úniko na Kòrsou i den Karibe pa tin e J Plasma”, asina dr. Charles Edwards a bisa EXTRA.

Manda leu

Meskos ku otro operashon, por hasié ku “verdoving” lokal. Meskos ku “liposuction òf liposculpture’  tambe e ta sosodé ku ‘verdoving’ lokal. E dòkter a splika ku ora manda e hende leu kompleto, ta einan por haña problema i p’esei ta mihó manda leu lokalmente. E J Plasma no ta kita vèt pero hasi e kueru mas strak pero pa hasié, mester saka algu di vèt promé.

Si e kueru ta kologá por hasi e J Plasma su so, pero promé ku pone e instrumento aden, mester traha un tùnel, prepará e kueru, los e vèt pa hasi e trabou. No por hinka esun di J plasma su so promé pero mester forma e kaminda, segun dr. Edwards. Mayoria hende tin tiki vèt i esei ta loke ta saka pa traha e tùnel pa por usa e J Plasma. Pa kada parti di kurpa ku ke trèk e kueru, tin un instrumènt i grandura.

 

Por hasi diferente e lugá pareu

Por hasi e J Plasma na diferente parti di kurpa na mes momentu pero mester tene na kuenta ku den tur kos tin un límite. “Nos ta limitá na 5 ora di operashon, saka 5 liter di vèt i un kantidat di (plaatselijke verdoving) spesífiko”. Dòkter Edwards ta duna lès den sirugia kosmétiko na Merka i e kos prinsipal ku mester siña un dòkter ta kon largu nan por hasi nan operashon i kuantu kos por hasi pareu. Tambe ta dependé di peso di e pashènt. Na Merka un dermatólogo por hasi e sirugia kosmétiko, un ginekólogo por hasi un sirugia kosmétiko, un dòkter di sirugia plástiko di mes por hasié, un siruhano general por hasié. Nan ta registrá na e kurso ku dòkter Edwards ta duna i ta siña kon pa hasi e operashon di forma safe, pa e no ta peliger pa un pashènt.

Diferensia mesora

Na momentu ku hasi e J Plasma por mira e diferensia mesora segun dòkter Edwards. E kueru ta strak mesora i e efekto maksimal ta mira entre 6 pa 9 luna. Si saka un potrèt kada luna, lo por wak e diferensia ei. I e J Plasma ta dura pa semper. Mester ta realístiko si, ku si e hende disidí di bira gordo, esei ta su propio responsabilidat. E J Plasma ku keda hasí, no ta bai i ta keda. Si wak beyesa di hende, segun nan bira grandi e kueru ta bira mas lòs i esei ta algu normal pero ora hasi e J Plasma e no ta bai, dr. Edwards a splika.

E téknika aki por keda hasí serka hende muhé i hende hòmber i e edat tampoko ta importá. E hende por tin e ploi den kueru i ‘stretch marks’ tambe i e J Plasma ta hasié mas strak.

 

No ta kòrta

E téknika aki ta buraku ta traha den e hende su kurpa, pa e instrumento por drenta i ta e mesun burakunan ei, por keda i no ta un kòrta. Ta bou di e kueru i e ta bai i ta aktivá e kolageno, laga nan kremp bira mas chikí i forma kolageno nobo.

Ora kaba di hasi e téknika ku e Renuvion J Plasma mester tene kuenta ku lo siguiente;

Ta e mesun kosnan ku bo ta hasi ora hasi un liposuction òf e liposculpture i esei ta bisti e faya. E faha ta yuda ku e kurpa no ta hincha muchu i ta tené strak i ta yuda e J Plasma traha mihó. Komo ta hasié lokalmente por mira e pashènt lanta kana i bai kas den mei pa 1 ora. Despues ta sigui bai konsulta serka dòkter pa kontrolá. For di e promé bishita na dòkter ya e pashènt ta bon bon. Un pa 2 siman na kas ta mas ku basta.

 

Operá na Kòrsou mes

Na Kòrsou nos hendenan ta hasi kosnan kosmétiko hopi. Tin hende ta hasié klandestino na Kòrsou i otronan ta forma nan grupo i bai hasi afó.  Esei ta pèrdida di sèn pasobra e sèn ta bai for di aki. Nos mester di e sèn bin aki. I p’esei segun dr. Edwards el a bin Kòrsou pa yuda aki i p’esei el a baha e preisnan di operashonnan, pa nan por keda hasí na Kòrsou mes. Ora bo operá na Kòrsou, bo ta keda rondoná di bo mes famia, bo no mester biaha bai niun kaminda. I hasiendo e operashon aki, bo tin e dòkter serka i e tei 24/7,e ta duna su number di selular i e pashènt por yam’é kualke momentu.

Benefishinan

E benefisio ta ku e ta hasi e kueru mas strak i mas lihé. Por wak e diferente operashonnan ku por hasi i en bes di kòrta ta hasi e liposculpture,  kombiná ku e J Plasma i no mester di kòrta. Bo ta pèrdè 15 aña sigur, dr. Edwards a bisa ku un sonrisa.

 

 

 

LAGA UN KOMENTARIO

Please enter your comment!
Please enter your name here