E di 10 edishon a ranka sali…
WILLEMSTAD.- Ta manera e públiko tabata ansioso pa e siguiente edishon di Curaçao North Sea Jazz Festival tuma lugá. Ayera nochi e di 10 edishon di e festival a kuminsá ku tremendo ambiente.
Un públiko basta grandi a akudí na e promé anochi kaminda tabatin aktuashon di ‘Afro 23’, ‘Leoni Torres’ i pa sera e anochi Nile Rodgers i CHIC a pèrkurá pa tremendo ambiente ku un repertorio karga di éksitonan.
Nos artistanan lokal ‘Tico Roberto & Friends’ tambe a pone ambiente na un “stage” ku a keda harma pafó di e sala di eksibishon di WTC ku ta konosí durante CNSJ bou di e nòmber di ‘Celia Stage’.
AWE
Pa awe nochi bo mester sòru pa bo tei fo’i trempan paso pa 7or di anochi Juan Luis Guerra i 440 ta start i ta sigur ku lo bo no ke pèrdè nada. Awe nochi lo tin presentashon tambe di Gregory Porter, Glady’s Knight, Seal, Judith Hill, Joss Stone i pa sera e anochi Marc Anthony.
DJASABRA
Jennifer Hudson ta enkargá pa habri e festival djasabra anochi ku su presentashon riba e tarima prinsipal ‘Sam Cooke’. Lo bo por disfrutá tambe dje presentashon di Matteo Mancuso, Kamasi Washington, Eros Ramazotti, Lizz Wright, Aloe Blacc i e popular Maluma ta sera e festival.
Parker na Sambil i Stadion Johnny Vrutaal na Rif i risibí transpòrt grátis pa konsierto. Kòrsou ta den gara di Curaçao North Sea Jazz Festival su di 10 edishon.
