Tremendo hòmber di deporte Sixto Laker a bai laga nos

WILLEMSTAD.- Aunke amigu Sixto tabatin su “krekechénan” ku edat ta trese kuné pa nos tur, Sixto no tabata malu o sigur no malu pa muri, asina Diana Daal a informá nos. Sixto te ku djamars último tabata prepará pa bai ‘gym’ su siguiente dia ku ta djárason mainta, pa asina mantené su mes den kondishon. Kòmbersando trankil na su kas, e gran dirigente i persona su kurason a stòp di funshoná. Paramédiko (nan) ku a yega rápidamente no por a hasi nada mas, i a konstatá ku Sixto a “bai” laga nos asina.

….Sixto Laker…

SIXTO LAKER a  nase dia 6 di ougùstùs di aña 1944 aki na Kòrsou. E gran Sixto ta mucha di Bándariba, di e bario yamá “Seru Grandi”. Sixto ta den deporte for di dia ku e tabatin 16 aña di edat. Esei ta nifiká ku Sixto tabata ligá ku deporte pa mas ku 65 aña, sea komo deportista o dirigente. Su deportenan preferí semper tabata: sòftbòl i beisbòl.

…Beisbòl i Sòftbòl…

Den beisbòl e tabata ligá ku e organisashon di Sta. Rosa Indians.  Promé komo hungadó dje organisashon Indjan, i despues pa masha hopi aña tambe komo entrenadó. Den sòftbòl “Sixturio” a funda e tim femenino sbc Twins Sisters, huntu ku “Winchi” Obispo. Tambe e tabatin e tim di sòftbòl sbc Bringamosa. Sixto, den sòftbòl maskulino, semper a hunga pa e tim di sbc Twins.

…Selekshonnan di Sòftbòl…

Pa masha hopi aña Sixto tabata parti di selekshonnan di sòftbòl maskulino huntu ku sòftbolistanan manera: Cedric Kirindongo, Jozef Martina, Romoldo Martis, Milto Martina, Eithel de Caster,  Ruben Josepha, “Wichi” Obispo, Wilson Obispo, Frank Mari i otro èks streanan.

…Den Little League…

Despues di hopi aña den e deporte di sòftbòl, Sixto a bai dediká su mes na beisbòl di mucha. (Little League) Sixto a remplasá otro gran personahe di deporte di Bándariba ku ta “Juancho” Josephina. E organisashon di beisbòl di mucha di dje Montaña Abou tabata un di esnan di mas grandi di nos Little League i ku a produsí mas mucha. Kasi tur tim di beisbòl Dòbel A tin den nan fila peloteronan ku sea a kuminsá o pasa den e organisashon di Montaña Abou.

…Masha hopi pelotero…

Entre nan tin: Ruderly Manuel, Reangelo Beaumont, Ray Michel, Marlison Brunken, Jason Kleinmoedig, e rumannan: Carlton, Argenis i Aldair Daal. Tambe e Big Leaguer di Boston Red Sox ku ta Ceddanne Rafaela a pasa den e organisashon enkabesá pa nos gran Sixto Laker.

…Ekspreshon di Sixto…

Hendenan ku konosé Sixto di serka ta konta nos ku Sixto su ekspreshon tradishonal komo dirigente di beisbòl tabata: “Den beisbòl ta un direkshon tin. No tin dos direkshon”… E tabata un hòmber di regla, ku énfasis semper riba disiplina, ku su “Si, ta Si, i Nò Ta Nò!!”…Den organisashon di Sixto si bo ta hunga beisbòl, bo tin di hasi bèst i siña na skol.

…Montab Ballpark…

Sixto tabata e motor tras di e parke Montab. Tur loke tin ku awe konosí komo Montab Ballpark tabata mondi. A limpia e mondi, i Sixto ta bai laga nos ku dos parke di beisbòl.

…Liga Pariba…

Sixto pa hopi aña tabata sea presidente o parti dje direktiva di Liga Pariba. E tabata klave den reglanan doméstiko dje Liga. El a yega di representá Little League den region tambe komo entrenadó i komo hefe di delegashon.

…Sixto na G.G.D….

Sixto tabata konosí den komunidat tambe pa su trabou responsabel na e ofisina di G.G.D. El a studia pa su trabou na tantu Estádos Unídos komo Jamaica. Na su trabou tambe semper el a gana konfiansa di tur hende pa su seriedat i konosementu.

…Trayektoria impreshonante…

Sixto tabatin sin duda un trayektoria impreshonante, i lo ta semper den memoria di nos tur komo un dirigente serio, di personalidat.

…Danki “Sixturio”…

Amigu, o “Sixturio”, danki pa bo trabou inkansabel pa nos hubentut, i pa deporte. Aunke nos tur lo tabatin e deseo di por konta kubo pa vários aña mas, Papa Dios a disidí otro, pero bo mishon ta kumplí. Bo kontribushon na formashon i edukashon di masha hopi mucha lo keda pa semper.

…Hopi forsa…

Hopi forsa na: Diana, Lindsay, Sidiane i tur otro famia, amigu i deportistanan. “Sixturio” Te Despues !!

(Skibí pa: Taffy de Jongh)