PHILIPSBURG. – E sospechoso Francesco Corallo (56) ku personal di e Tim pa Kombatí Kriminalidat (TBO) di Recherche Samenwerkingsteam (RST) a detené riba petishon di outoridatnan Italiano ta den enkarselashon preventivo. E lo presentá djawes dilanti di un hues komisario pa “toetsing” di su detenshon.
Italia lo pidi pa su ekstradishon pa entre otro froude ku impuesto i labamentu di plaka.
E tim entre tantu ta trahando pa konfiská entre otro bienes inmobil i tres boto di e sospechoso. Outoridatnan Italiano a indiká ku por konfiská propiedatnan di e sospecho te ku un suma di 215 mion euro.
E aresto i entradanan hudisial ta forma parti di un akshon kordiná internashonalmente ku a tuma lugá na Italia, St. Maarten, Ulanda i parti Franses di St. Maarten. Na e parti Franses di St. Maarten a detené R.B. (50) nase na Ulanda. Na Italia a arestá sospechosonan i a ehekutá entradanan hudisial. Na Ulanda a hasi entrada hudisial na un ofisina.
E koperashon internashonal entre Italia, St Maarten, parti Franses di St. Maarten i Ulanda ta kuadra den e esfuersonan konhunto pa intensivamente kombatí kriminalidat ku ta krusa frontera manera korupshon i froude, kual tambe ta keda denominá komo krimnalidat ku ta mina. Kriminalidat ku ta mina manera korupshon i labamentu di plaka ta forma un menasa serio pa seguridat i ekonomia di e paisnan den Karibe ku ta forma parti di Reino Ulandes. TBO di RST, Ofisinanan di Landsrecherche di Kòrsou i St. Maarten i Ministerio Públiko ta partner den e esfuersonan pa kombatí kriminalidat ku ta mina.

LAGA UN KOMENTARIO

Please enter your comment!
Please enter your name here