WASHINGTON, MERKA, AFP.- A deklará tres hòmber koló kla kulpabel pa asesinato di un hòmber afroamerikano djárason. E hòmbernan a persiguí e víktima den un pikòp i tir’é mata.
Travis McMichael, esun ku a tira Ahmaud Arbery, su tata Gregory McMichael i nan bisiña William Bryan ku a tuma parti den e persekushon, a wòrdu sentensia ku múltiple akusashon di asesinato i asalto entre otro.
Un hurado di Brunswick, Georgia, a deliberá pa ménos di 12 ora durante dos dia promé ku a disidí riba e veredikto.
Travis McMichael, 35, Gregory McMichael, 65, un agente polisial retirá, i Bryan, 52, ta enfrentá bida largu den prizòn pa e asesinato di Arbery den febrüari 2020.
E públiko a selebrá e veredikto despues di e anunsio. E tata di Arbery a bisa durante e reunion ku “mi no ke mira niun tata” eksperensiá kon ta detené i tira nan yu mata.
Presidente Joe Biden tambe a selebrá e veredikto pero a bisa ku ainda tin hopi trabou pa hasi pa kombatí rasismo den Merka.
