HABANA (AP).- Tres persona a muri di kólera na Cuba den e temporada aki i desena di pashènt a wòrdu hañá positivo ku e bakteria na ost di e pais.
Outoridatnan kubano a konfirmá e mortonan i a sigurá ku e brote di e enfermedat aki – ku no ta usual na Cuba pero ku a kosta míles di bida den otro nashonnan di Caribe – ta kontrolá. No a indiká e orígen di e vírus.
Un nota publiká ayera den e korant ofisial Granma a informá ku a atendé mas o ménos 1.000 pashènt ku infekshonnan na stoma i tripa di kua 53 a resultá positivo ku kólera i tres di nan – di entre 66 i 95 – a muri. E personanan ku a muri tabatin ‘enfermedatnan króniko’, loke a empeorá nan estado, as ina e komunikado a informá. Segun e komunikado ku Ministerio di Salubridat a firma, e zona ku mas persona ku infekshon na stoma i tripa ta Manzanillo, provinsia di Granma, na 700 kilometer na ost di e kapital aki.
