Meditashon silensioso komo protesta pafó di Inmigration and Customs Enforcement (ICE) na Chicago. E di tres siudat mas grandi di Merka a bira un ‘target’ di presidente Trump den su kampaña di deportashon estranheronan.
WASHINGTON (AFP).- Un tribunal federal di apelashon a konfirmá e suspenshon di presensia di tropanan di Guardia Nashonal den Chicago i rondó dje siudat, rechasando un solisitut di e gobièrnu di Donald Trump. E tres huesnan di tribunal a determiná ku e gobièrnu di Trump no a demostrá ku e kondishonnan den e siudat di Illinois, e di tres mas grandi di Merka ta hustifiká e presensia di e tropanan. “Inkluso despues di a konsiderá ku gran diferensia e evaluashon di sirkunstansianan di parti dje presidente, nos no ta mira sufisiente prueba di un rebelion òf un peliger den Illinois”, segun e deklarashon dje tribunal.
“E akshonnan enérgiko, sostené i tin biaha violento di e manifestantenan den protesta kontra di e polítika i akshonnan migratorio di gobiernu federal no ta duna lugá pa un peliger di rebelion kontra di outoridat di gobiernu”, segun e tribunal a trese dilanti. Gobiernu “ta sigui konta ku prohibishon pa desplegá Gaurdia Nashonal den Illinois”, segun e konklushon.
Illinois i e siudat di Chicago a presentá un demanda pa blòkia e presensia militar, un medida ku tambe a keda adoptá pa outoridatnan di e estado di Oregon. Nan no ta e promé estadonan pa kuestioná dilanti di hustisia e uso ekstraordinario di Guardia Nashonal di parti di Trump. California, goberná pa demokrat, a presentá un demanda despues ku e presidente republikano a manda tropanan Los Angeles pa para manifestashonnan provoká pa e representashon federal kontra di inmigrantenan sin dokumento. Un hues dje distrito a deklará e presensia militar ilegal, pero un panel di apelashon despues a permití pa e sigui.
