WASHINGTON (AFP).- Un tribunal federal di apelashon ayera a blòkia un òrdu presidensial di Donald Trump ku ta prohibí pa personanan ku drenta Merka ilegalmente via frontera mehikano por presentá un solisitut di asilo na Merka. E prohibishon aki ta figurá den un proklamashon dje presidente norteamerikano for di e promé dia di su mandato, den kua e ta bisa ku e situashon na frontera zùit di Merka ta konstituí “un invashon” pa motibu dje kantidat di hende sin dokumento ku ke drenta Merka.
Un hues federal na Washington a suspendé su aplikashon, konsiderando ku solamente Lei di Imigrashon i Nashonalidat ta rigi prosedimentunan di ekspulshon. “Nada den e Lei di Inmigrashon i Nashonalidat ni den Konstitushon ta duna e presidente òf su representantenan e podernan eksorbitante riba e tereno aki”, segun el a skirbi.
Un tribunal di apelashon di Washington ayera a konfirmá e punto aki. “Kongreso a adaptá e lei riba asilo ku ta ofresé ku tur strañero presente físikamente na Merka e derechi pa solisitá asilo i pa eksaminá e solisitut di manera individual”, segun e tribunal di apelashon ta bisa. “Si gobièrnu ta deseá na kambia e sistema, “e mester presentá su argumentonan na e úniko poder pa kambia e Lei di Inmigrashon i Nashonalidat: Kongreso”, segun e ta bisa mas aleu.
Diestres persona kendenan ta bisa di a hui di perkushon den Afganistan, Ecuador, Cuba, Egipto, Brasil, Turkia i Perú, komo tambe tres miembro di organisashon di defensa di derechi di imigrantenan, a apelá e kaso. Seis di nan ya a keda ekspulsá, segun e hues a trese dilanti.
Trump a konvertí e lucha kontra di imigrashon klandestino komo un prioridat apsoluto, refiriendo na un “invashon” di Merka di parti di “kriminalnan ku ta bin di otro pais”.
