ROMA, AP.- Un tribunal italiano a aseptá apelashon di e grupo di asistensia spañó Open Arms i a suspendé Ministerio di Interior su òrdu di prohibí entrada di algun boto den Italia.
E boto tin dos siman den Laman Mediteráneo ku 147 migrante na bordo, dor di e prohibishon di minister di interior italiano, Matteo Salvini, kende su polítikanan kontra inmigrashon a pone Roma den un bataya kontra su sosionan di Union Europeo.
Korte a disidí ku e prohibishon ta violá e derechi internashonal di “un situashon eksepshonalmente grave i urgente debí na e estadia largu di e migrantenan riba nos boto”, segun indikashon di Open Arms den un komunikado djárason.
E komunikado a agregá ku e boto lo dirigí pa Italia i ta spera di yega pa djaweps mainta. Ademas, e grupo di asistensia a bolbe pidi Italia i Malta pèrmit pa yega na nan haf i pa asina laga e migrantenan baha pa motibu di salú.
Salvini a oponé kontra e echo ku botonan humanitario ta yega hafnan italiano. E ministerio di Interior italiano a bisa ku lo apelá e desishon.