Durante último añanan
WILLESTAD.- Kòrsou ta den negoshashon ku Trinidad and Tobago pa sera un asina yamá “Partial Scope Trade Agreement” (PSTA). PSTA ta un akuerdo bilateral pa entre dos pais ku ta palabra ku ta eksportá sierto produkto (no tur produkto) kontra di kondishonnan faborabel, por ehèmpel ta paga un tarifa abou òf asta sero porshento na derecho di importashon.
Segun e korant Trinidad and Tobago Newsday, Caryl Monte komo presidente di e komishon permanente pa komersio internashonal i relashonnan ekonómiko ku eksterior di Kòrsou tabata resientemente na Trinidad and Tobago kaminda el a reuní entre otro ku sekretario permanente di e Ministerio di Komersio di e pais, Randall Karim. E reunion aki a marka final di e promé buèlta di negosiashonnan entre Kòrsou i Trinidad and Tobago pa yega na un PSTA.
E promé reunion a tuma lugá dianan 17 i 18 yüli na Kòrsou. Tópikonan di deliberashon durante e reunionnan tabata aksesibilidat riba merkado pa produkto, kriterio pa determiná kiko ta konsiderá un produkto ku ta originá di e pais, servisionan, asuntunan legal i institushonnan, areglo di disputa i koperashon tékniko.
Na kuminsamentu di e reunionnan e minister di Komersio di Trinidad and Tobago, Paula Gopee-Scoon a bisa ku inisio di e negosiashonnan ta representá un avenida nobo pa fomentá lasonan diplomátiko mas estrecho riba retonan ku ámbos pais ta konfrontá.
E minister ta sigui bisa ku negosiashon pa sera PSTA ta kuadra ku e maneho komersial di Trinidad and Tobago 2019-2023, spesífikamente e meta ku a pone pa amplia kuota riba merkadonan tradishonal i no tradishonal pa medio di mas penetrashon di merkadonan di eksportashon, eksplorá merkadonan nobo, alsa oportunidatnan di hasi ganashi, drecha diplomasia komersial i profundisá regionalismo.
E lasonan ta permití alabes utilisashon kompleto i ekspanshon di relashonnan eksistente, inkluso transporte aéreo. Na novèmber 2023 Kòrsou i Trinidad and Tobago a firma un akuerdo riba servisio aéreo.
Segun e minister a sigui bisa e akuerdo riba servisio aéreo aki a pone e fundeshi pa desaroyo mutuo di industria- i ekonomianan fomentando interkambio kultural i fortalisando lasonan komersial huntu ku otro benefishinan. Esaki pasobra ta e akuerdo ta hasi posibel pa e poblashonnan konektá i topa ku otro mas fásil.
Trinidad and Tobago den último añanan tabatin un balansa komersial positivo ku Kòrsou ku un kresementu eksitoso di merkado pa produktonan manera “corn flakes”, matras, produktonan di papel, kímikonan pa agrikultura, bibidanan ku gas manera limonada, muebel di palu i produktonan pa limpiesa.
E kantidat di produkto ku Trinidad and Tobago ta importá for di Kòrsou tambe ta kresiendo, loke segun e minister ta demostrá un interes kresiente di importadónan pa tin akseso na produktonan di Kòrsou.
E negosiashonnan pa yega na e PSTA ta kontinuashon virtualmente entre seshonnan. Pa novèmber awor ta plania pa inisiá ku e di dos buèlta di negosiashonnan.
