PORT OF SPAIN (AFP).- Trinidad and Tobago ta prepará un proseso di deportashon masivo di migrantenan sin dokumento, meimei di un krísis ku Venezuela pa motibu di a risibí un barku di guera norteamerikano pa ehersisionan militar. Venezolanonan ta e prinsipal komunidat di migrantenan riba e isla.
E Minister di Seguridat Nashonal a ordená pa “sera tur inmigrante ilegal ku keda detené” pa despues realisá un deportashon masivo. E relashon bilateral entre e dos paisnan a deteriorá ku yegada na poder di Kamla Persad-Bissessar, ku tin un posishon kontra di migrashon venezolano, posishon ku ta kore pareu ku e linia di Washington.
Un barku di guera norteamerikano, e USS Gravely, a yega Port of Spain djadumingu ku intenshon pa hasi ehersisionan militar. E ta forma parti di un flota ku a drenta Karibe den luna di ougùstùs pa operashonnan kontra di narkotráfiko den e region, pero ku segun gobièrnu venezolano mas bien tei pa buska pa tumba e presidente Nicolas Maduro.
Parlamento venezolano tin plania pa deklará e gobernante trinidense komo persona non grata.
