WILLEMSTAD.- Pa di tantísimo biaha, funshonarionan di Xteam a keda dirigí pa Kaminda Tene Kòrsou Limpi ku ta keda den área di Klein Hofje.
Esaki despues di a haña yamada ku deskonosínan lo mester a tira diferente sushi den e área kantu di kaminda. I ta sushinan ku resien a keda tirá.
Mesora e funshonarionan a bai den e área pa asina tuma nota di e situashon. Na nan yegada a tuma nota di e situashon i mesora a topa ku diferente bòn i algun otro kos ku ta proba ken ta esun responsabel pa e sushinan.
A bin sali na kla ku ta un trùk di pan den área di Rooseveltweg ta kousante di tur e sushinan ku a keda tirá di forma ilegal. E funshonarionan lógikamente mesora a bai atendé ku esaki.
Ta bon pa kòrda tur komersiante ku maske bo paga hende pa tira bo sushinan afó, abo ta esun ku ta keda finalmente responsabel tur momentu den kaso ku e sushinan keda di dùmp na un sitio di forma ilegal.
