WASHINGTON (AFP).- Presidente di Merka, Donald Trump, ayera a bisa di lo imponé impuesto di 25% general riba produktonan di Union Europeo, di kua ta konosí e anunsio antisipá ku nan lo bin ku un reakshon firme.
“Nos ta anunsiá e 25 porshento di impuesto, den términonan general, ku lo keda apliká riba outo i tur otro kos”, segun e mandatario norteamerikano a duna di konosé.
Trump a ripití su reklamo kontra di paisnan europeo, di kua el a bisa ku “nan no ta aseptá nos outonan ni produktonan agríkola”.
“Nan ta probechá di nos na un manera diferente kompará ku Canada i Mexico”, el a agregá.
E mandatario a ripití ku e défisit komersial di Merka ku Europa ta di “300.000 mion dòler”, sifra ku e Komishon Europeo a rechasá, kalkulando nan mes na 150.000 moin euro (157.000 mion dòler) .
“Union Europeo a diseñá sierto kosnan pa molestiá Merka. Esei tabata e meta i nan a logra. Pero awor ami ta e presidente”, e republikano a bisa, agregando ku e paisnan europeo por tin gana di tuma represaya, pero “nan lo no hasi esei.
“Djis nos mester stòp di kumpra kualke kos i si esei tuma lugá, nos a gana”, segun Trump a sigurá.
Despues ku e anunsio a bira konosí, Union europeo a atvertí via di un bosero di Komishon Europeo ku nan lo reakshoná ku “firmesa i di forma dirèkt” i ku “semper lo protehá empresanan, trahadónan i e konsumidónan europeo”.
