WASHINGTON, AP.- Presidente Donald Trump a atvertí ku Norkorea por enfrentá “kandela i furia” despues ku un rapòrt nobo a indiká djamars ku funshonarionan di inteligensia di Merka ta kere ku Pyongyang a produsí un arma nuklear chikitu pa su misilnan.
E alarma na Washington kontra intento di e lider norkoreano Kim Jong Un di atkerí kapasidat nuklear a intensifiká despues di dos ensayo ku misilnan interkontinental luna pasa.
E último indikashon ku a produsí un arma nuklear miniatura por nifiká ku Norkorea por kombertí den un potensia nuklear klave.
“Mihó Norkorea no hasi ningun menasa mas kontra Merka. Nan ta wòrdu rospondé ku kandela i furia nunka bisto na mundu”. Asina Trump a bisa durante un seshon informativo riba adikshon di droga riba su kampo di gòlf na Bedminister, New Jersey.
E ministerio di Defensa hapones a konkluí den un dokumento ofisial publiká djamars ku posiblemente “Norkorea a logra miniatura di armanan nuklear”. Hapon, un aliado klave di Merka, tambe ta un blanko potensial di agreshon norkoreano.
E korant The Washington Post a informá djamars, ku segun funshonarionan di inteligensia merikano, Pyongyang a produsí armanan nuklear pa misilnan balistiko, inkluyendo esnan interkontinental, kapabel di yega teritorio kontinental merikano.
