WASHINGTON, AP.- Presidente Donald Trump a distansia di su desishon pa sera frontera di Merka ku México, i na lugá di esaki introdusí impuesto riba outonan produsí na México si e gobièrnu mehikano no hasi algu pa para e fluho di migrantenan ku ta yega Merka.
Trump a komentá na reporteronan ku e lo purba tuma “un medida ménos drástiko” promé ku e “usa” e menasa ku el a hasi anteriormente.
“México ta komprondé ku nos lo sera frontera òf ku mi ta pone impuesto riba outo. Mi lo hasi esun òf e otro, i probablemente mi ta skohe pa impuesto”, asina e mandatario a bisa na Kas Blanku.
Esaki tabata un kambio drástiko pa Trump, kende a tweet siman pasá ku e lo sera frontera òf sekshonnan di esaki e siman binidero si México no para e fluho “di tur inmigrashon ilegal ku ta rumbo pa Merka”.
Tantu asesornan di Kas Blanku, komo gobernante di siudatnan na frontera merikano i ekonomistanan a atvertí ku e akshon aki lo tin konsekuensianan ekonómiko enorme pa ámbos banda di frontera, interumpiendo tur kadena di suministro i oumentando preis pa e konsumidó di Merka riba produktonan ku ta varia desde awakati te na outo.
