WASHINGTON, AP.- Biaheronan prosedente di 8 pais lo tin di pasa dor di restrikshonnan migratorio na momentu di drenta Merka, ku por ta un prohibishon total pa drenta te ku impedimentu mas spesífiko, esaki bou di e proklamashon nobo firma pa presidente Donald Trump ayera.
E reglanan nobo ku lo drenta na vigor pa siudadanonan di Chad, Iran, Libia, Nort Korea, Somalia, Siria, Venezuela i Yemen ta drenta na vigor dia 18 di òktober.
E restrikshonnan ta for di e prohibishon total manera den kaso di biaheronan di Siria, i otronan mas spesífiko. E suspenshon di visa temporal manera pa Venezuela, lo keda apliká solamente pa algun funshonario gubernamental i nan famianan.
E anunsio a keda hasi riba e mesun dia ku ta surgi un kontroversial di restrikshon migratorio di Trump pa e biaheronan prosedente di seis pais di kual mayoria musulman ku a ekspirá 90 dia despues ku el a drenta na vigor.
“Komo presidente, mi tin di aktua pa protehá e seguridat i interes di Merka i di su hendenan”, asina el a lesa den e proklamashon.
Outoridatnan a indiká ku e visanan ku ta na vigor lo no keda revoká komo resultado di e proklamashon. E restrikshonnan lo ta dirigí pa paisnan ku segun e departamento di seguridat nashonal ta nenga na kompartí informashon ku Merka òf ku no a tuma medidanan di seguridat nesesario.
Kontrali na e promé restrikshon migratorio di Trump, kual a provoká káos den e airopuertonan di teritorionan merikano i un avalancha di desafio legal, e funshonarionan a indiká ku nan a traha lunanan riba e reglanan nobo, esaki den koperashon ku vários agensia i den komunikashon ku gobièrnunan ekstranhero.
E restrikshonnan ta basá riba un punto nobo di referensia desaroyá pa e departamento di seguridat nashonal. For di esei, Merka a kompartí e kriterionan ku kada pais na mundu i a duna nan 50 dia pa kumpli ku esakinan. E 8 nashonnan ku lo tin di enfrentá e restrikshonnan migratorio a nenga òf no a kumpli ku loke a pidi nan.
