Miéntras ku Merka ta armando un posibel atake riba Venezuela, otro lider di oposishon venezolano Alfred Diaz a fayesé den prizòn na e pais. Su entiero a tuma lugá ayera riba e isla di Margarita.
WASHINGTON (AFP).- Merka a konfiská un barku petrolero grandi dilanti kostanan di Venezuela, segun e presidente Donald Trump, meimei di tenshonnan kresiente entre Washington i Caracas. “Nos a kaba di konfiská un petrolero dilanti kosta di Venezuela, unu barku grandi, hopi grandi… esun mas grandi hamas konfiská”, segun Trump a bisa na periodistanan. “I tin mas kos ta sosodé, bosnan lo sa despues”, el a agregá na inisio di un konferensia di mesa rondó ku empresarionan i funshonarionan haltu dje pais.
E mandatario republikano, kende a start un kampaña di preshon kontra e gobièrnu di Nicolas Maduro for di despues ku el a yega na poder, no a duna detayenan riba e barku, su propietario òf su destino. “El a keda konfiská pa bon motibunan”, el a limitá su mes na bisa. “Lo publiká potrètnan dje operashon”, segun el a agregá i mas aleu a bisa “mi ta kere ku nos lo keda ku e petroli”.
Trump ta konsiderá ku e dianan di Maduro ta “kontá” segun un entrevista resien. E prinsipal rekurso di Venezuela ta petrolio, ku ta bou di embargo. Esei ta obligá e pais pa pone su produkshon riba merkado pretu na preisnan hopi mas abou, destiná partikularmente pa paisnan asiátiko.
Washington mas aleu ta akusá e gobiernu di Maduro di ta un régimen”narko terorista”, i pa e motibu ei a start un kampaña militar pa destruí loke e ta yama lanchanan kargá ku droga den Karibe i den Osean Pasífiko.
