WEST PALM BEACH, FLORIDA, MERKA, AP.- E presidente di Merka, Donald Trump, a kritiká FBI djasabra anochi, afirmando ku e agensia “a pèrdè tur señal” ku e sospechoso a duna di e tiroteo den un skol na Florida. El a indiká ku “nan a pasa demasiado tempu demostrando ku tin un intervenshon ruso ku e kampaña di Trump”.
FBI a haña e aviso luna pasá tokante e sospechoso di e tiroteo di Florida. E aviso tabata indiká ku e tin “deseo di mata”, i e tin akseso na armanan i por ta preparando un atake. Pero e agensia a bisa djabièrnè ku e agentenan no a investigá e kaso.
E kaso aki a kousa krítika fuerte di e sekretario di Hustisia, Jeff Sessions. E gobernador republikano di Florida, Rick Scott, un aliado di Trump a pidi renunsia di e direktor di FBI, Christopher Wray.
Trump i otro republikanonan a kritiká FBI fuertemente. Nan a indiká ku nan no ta satisfecho ku su desishon di no presentá kargonan kontra Hillary Clinton relashoná ku su uso di un server priva di e-mail i a indiká ku nan ta mira indikashon di e tendensianan partidista di e investigador spesial Robert Mueller riba posibel lasonan entre Rusia i e kampaña di Trump.
