E potrèt ku e propio Donald Trump a publiká, kaminda e ta aparesé komo Hesu Kristu pa kura un persona.
WASHINGTON (AFP).- Ayera presidente di Merka, Donald Trump, a kita un potrèt riba retnan sosial kaminda e ta aparesé komo Hesu Kristu, despues di un laman di krítika di lidernan religioso kende nan a akus’é di blasfemia. E imágen, publiká riba Truth Social ta mustra Trump ku un paña blanku i un mantel kòrá, ta mishi na frenta di un hòmber ku ta parse di ta malu i mandando lus na su kabes.
Tambe por a mira bandera di Merka, entre águila i sòldánan den shelu, i e estatua di Libertat huntu ku vários persona ku ta mira e presidente ku reverensia. Puntrá riba su publikashon, Trump a nenga ku e tabata purba na parse Hesu Kristu. “Si, m’a publik’é i a pensa ku ta ami komo dòkter i ku mi tin di aber ku Krus Kòrá”, segun el a bisa na periodistanan.
“Ta suponé ku t’ami komo dòkter, hasiendo pa e hendenan rekuperá. Ami ta hasi kosnan pa e hendenan rekuperá. Te hasta pa e hende rekuperá hopi bon”.
E publikashon a provoká un ola di indignashon serka vários kristian konservador kende nan ta keda kontá komo partidarionan grandi di Trump i di su movimentu MAGA. “Mi no sa si e presidente a pensa ku e tabata hasi algu prèt òf si e ta bou di influensia di un sustansia òf ki posibel splikashon e por tin pa tapa e blasfemia skandaloso aki”, segun Megan Basham, un periodista i komentarista konservador.
