Un grupo di e asina yamá “afrikaners” na momentu di a yega Dulles International Airport na Washington.
WASHINGTON (AFP).- Presidente di Merka, Donald Trump, a oumentá for di 7.500 pa 17.500 e kantidat anual di refugiadonan den e pais pa por logra haña te ku 10.000 surafrikano blanku adishonal, segun un desishon publiká ayera den e korant ofisial, Federal Register.
Den 2025 e gobièrnu di Trump a redusí na 7.500 e kantidat máksimo di refugiadonan atmití pa Merka, kompará ku 125.000 dje aña promé. Na e okashon ei el a bisa di ke duna prioridat na e minoria blanku di Suráfrika. Por sierto, ku e 4.499 personanan atmití na Merka komo refugiado for di komienso di aña fiskal (ku ta kuminsá 1e di òktober) ta surafrikanonan, ku eksepshon di tres afgano.
Gobièrnu di Trump ta akusá outoridatnan surafrikano di ”persekushon” di “afrikaneres”, desendientenan di europeonan dje pais. Ademas, ta akusá Pretoria pa e denunsia dje pais na Korte internashonal di Hustisia pa “genosidio” kontra di Israel pa e guera den Gaza. Den un desishon fechá 21 di mei i publiká ayera, Trump a referí na un “situashon di emergensia”, provoká segun su persona pa ”un oumento resien di violensia di karakter rasial” di parti di gobièrnu i partidonan polítiko surafrikano. Konsekuentemente, el a ordená ku e kantidat di 7.500 refugiado pa aña por oumentá te na 10.000, i a pone bon kla ku “e atmishonnan adishonal mester keda otorgá na ‘afrikaneres’ di Suráfrika”.
E “afrikaneres” ta forma e mayoria dje poblashon blanku di Suráfrika. Di e sektor di poblashon ei a surgi e dirigentenan polítiko ku a duna forsa na e apartheid, e sistema di segregashon rasial ku for di 1948 te ku komienso di añanan di 1990 a priva e poblashon pretu -ku ta gran mayoria- di gran parti di na derechinan.
