A kuminsá surgi sierto duda relashoná ku ekspreshonnan di Donald Trump
WASHINGTON (AFP).- Donald Trump no ta deskonosí pa su lenguahe provokadó. Pero, su menasa di eliminá e sivilisashon iraní, huntu ku otro komentarionan resien di intimidashon, a pone ku su krítikonan ta kuestioná e salú mental dje presidente norteamerikano.
E mandatario di edat mas haltu den historia di Merka a intensifiká su retórika di menasa na momentu ku su frustrashon ta sigui krese pa motibu dje negativo di Teheran pa yega na un akuerdo ku lo pone fin na e guera den Medio Oriente. Inkluso algun di su eks-aliadonan a pidi destitushon dje republikano di 79 aña, despues di un seri di publikashon riba retnan sosial partikularmente ekstrabagante i, na sierto okashon, inkorekto i grosero.
Mundu awor ta puntra si Trump lo kumpli ku su menasa i eksigensia pa Iran habri bèk e kanál di Ormuz, òf si, kontrario na esei, lo e dal un stap patras, manera el a hasi ya na diferente okashon.
“Un sivilisashon kompleto lo disparsé, pa no regresá nunka mas. Mi no ta deseá pa esei tuma lugá, pero ta probabel ku lo e sosodé”, Trump a skirbi riba su ret sosial Truth Social apénas 12 ora promé ku e deadline vense. Pa motibu dje kresiente alarma mundial, White Huose a haña su mes obligá pa desmentí e spekulashonnan dje deklarashon en kuestion, manera e.o. e komentarionan dje visepresidente J.D. Vance riba e eksistensia di “armanan de nos arsenal ku, te ku awor, nos no a disidí na usa, ku kua Trump a referí na armanan nuklear.
“Realmente e ta parse di ta un poko mas for di balans ku den pasado”, segun Peter Loge, direktor di Skol di Medionan di George Washington University. Pero apesar di tur kos, “e aktitut aki ta kuadra den e patronchi mas amplio di parti di Trump pa impreshoná otro hende”, segun el a agregá.
“Mi pronóstiko ta, ku segun e fecha dje ultimatum nobo ta aserká, e presidente lo deklará viktoria i bisa: “M’a logra pa pone Iran sinta na mesa di negosashon i lo mi dun’e dos siman mas”.
