NEW YORK, USA (AFP).- Donald Trump a bolbe presentá ayera den un kaso sivil di parti di estado di New York kontra di su empresa familiar pa froude finansiero, i a ripití ku e ta víktima di un proseso inhustu.
E eks-presidente norteamerikano ta keda akusá, huntu ku su dos yunan, Donald Jr i Eric, di a gaña balor di nan aktivonan inmobilario dje empresa Trump Organisation na miónes di dollar ménos. Nan a hasi esaki pa logra haña kréditonan bankario mas bentahoso. Famia Trump ta nenga di a kometé froude.
Durante tratamentu dje kaso, e eks-presidente kende ta faborito den elekshonnan republikano pa elekshon presidensial di 2024, a akusá na vários okashon e hues Arthur Engoron, ku a start e kaso, di ta “loko, totalmente desekilibrá i peligroso” i di “ta hasi trabou sushi pa Partido Demokrat”.
Tambe el a tilda e fiskal general di estado di New York, Letitia James, di ta “korupto” i “rasista”. Den e sala, e eks-presidente tabata eksaminá dokumentonan miéntras ku su abogadonan tabata interogá Eli Bartov, un akountent ku a aportá ku pruebanan na su fabor. Pa Bartov, e denunsia di James no tin base pasobra “accountancy ta basá riba reglanan… algun dje puntonan ta apsurdo”, segun el a bisa.
E testigu na fabor di Trump a trese dilanti ku 3 pa 4 porshento di empresanan ta informá ku tabatin fout den nan informenan finansiero. Erornan finansiero ta inevitabel. ”Si bo kometé un eror froudulento, lo bo hasi tur posibel pa skonde esaki…no tin nada ku el a skonde”, segun e testigu na fabor di Trump.
Mas kaso na kaminda
Esaki ta djis unu dje kalvarionan hudisial ku ta spera Donald Trump. Kuminsando 4 di mart, lo e sinta den banki na Washington pa supuesto intentonan di kambia resultado di elekshonnan di 2020, den kua el a keda derotá pa e demokrat Joe Biden.
Tambe tin otro kaso na kaminda pa supuesto maneho robes di dokumentonan sekreto ku el a hiba kas despues ku e mester a sali for di White House i tambe e ta akusá di krímen organisá na Georgia pa akusashonnan ku el a purba di anulá e resultado di elekshon di 2020 den e estado zùit di Merka.
