E bombardeo merikano/israelí riba Iran ta kousando destrukshon enorme na Iran. Gobièrnu dje pais a bisa ku nan lo no entregá.
MIAMI, USA (AFP).- Donald Trump a bisa ayera na e kanal CBS ku e guera ta “praktikamente kabá”, ya ku Iran ya no tin “marina, ni komunikashon, ni forsa aéreo”. E presidente norteamerikano a agregá, den un entrevista na telefòn, ku e konflikto ta “hopi avansá” relashoná ku e kalènder di kuater pa sinku siman ku el a fiha anteriormente.
“Nan misilnan a keda redusí na algun tiru separá. Nan ‘drones’ ta keda destruí tur kaminda, inkluso e parti di produkshon”, segun el a agregá. “Bon mirá, no a sobra nada. No tin nada mas den sentido militar”, segun el a agregá.
Den e último dianan, e presidente norteamerikano a hasi evaluashonnan similar di e dañonan di guera kousá pa e atakenan di Merka i Israel, ku a kuminsá 28 di febrüari. El a hasi e komentarionan apesar ku Pentágono a bisa djaluna ku Merka “apénas a kuminsá bringa”.
Ora ku a puntr’é si e ta kere guera ku e guera lo kaba lihé, Trump a bisa na CBS: “Ami so sa dje final, ningun hende mas”. Trump mas aleu a menasá Iran si esaki purba na sera e kanal di Ormuz, e via marítimo kaminda ku e tránsito di petrolio praktikamente a para, loke a pone ku preis di petrolio a subi rònt mundu. Trump a bisa di ta “pensando pa tuma kontròl dje zona ei”.
E presidente norteamerikano, sinembargo, tabatin masha poko palabra pa e lider supremo nobo di Iran, e ayatola Mojtaba Jamenei, eligí pa remplasá su tata Ali Jamenei, kende a keda asesiná.
“Mi no tin ningun mensahe p’é. Ningun, nada”, Trump a bisa, agregando di a pensa riba otro persona pa dirigí Iran. Den entrevista ku New York Post, Trump a bisa di no ta “kontentu” ku e nombramentu di Mojtaba Jamenei.
