Presidente norteamerikano, Donald Trump, den reunion ku e presidente salvadoreño, Nayib Bukele, ayera na White House. E dos mandatarionan ta di akuerdo ku Merka tin ku sigui deportá migrantenan ilegal i sera nan na e pais sentroamerikano.
WASHINGTON, (AFP).- “Nos tin hopi gana di yuda”, segun e presidente salvadoreño, Nayib Bukele, a bisa ayera na Donald Trump, na White House. Trump a trese dilanti ku Bukele ta su mihó amigu di Amérika Latina. Bukele a enkarselá algun shen migrante deportá for di Merka bou akusashon di ta miembronan di gèn.
E relashon entre e presidente salvadoreño i e presidente norteamerikano a resaltá ayera durante di un enkuentro den e ofisina oval.
E bishita a kuminsá ku un dunamentu fuerte di man i a kaba ku Bukele hasiendo un gesto ku duim ariba, na su salida, ora ku periodistanan a puntr’é kon e reunion a desaroyá.
“E ta yudando nos. Nos ta gradesido na su persona”, segun Trump a bisa rondoná pa gran parti di su gabinete, inkluso e hefe di diplomasia Marco Rubio i e sekretaria di Seguridat Interior Kristi Noem i e fiskal general Pam Bondi.
“Nos ta hopi kontentu i nos tin hopi gana di yuda”, segun Bukele a bisa. “Echo ta, ku señor presidente mester libra 350 mion norteamerikano dje delinkuentenan pero pa hasi esei “mester sera algun. Asina e kos ta funshoná, tog?”,segun e mandatario salvadoreño a opiná. Meskos ku Trump, Bukele tambe den su pais ta hiba un guera kontra di gènnan.
Trump a dun’é rason. Tambe nan tabata di akuerdo riba destino dje migrante salvadoreño, Kilmar Ábrego García, deportá pa “eror”, pero White House ta nenga na tres’é bèk.
