SINGAPORE, AP.- Presidente merikano Donald Trump i e lider norkoreano Kim Jong Un a yega Singapore djadumingu, dos dia promé ku un kumbre sin presedente pa purba resolvé e tenshon provoká pa e arsenal nuklear di Pyongyang.
E avion presidensial Air Force One a aterisá na un base militar proveniente di Canada, kaminda Trump a partisipá den e kumbre G7.
Algun ora promé, e avion ku a trasladá Kim a aterisá djadumingu entre medidanan fuerte di seguridat den e aeropuerto den e siudat. Despues di sagudí man di e sekretario di Eksterior na Singapore, Kim a pasa den kayanan di e siudat den un limuzin ku dos bandera norkoreano, rondoná pa otro outonan pretu rumbo pa e hotèl luhoso St. Regis. Kim tabata smail ampliamente na momentu ku el a reuní ku e promé minister Lee Hsien Loong.
Mundu kompleto ta opservando e kumbre históriko entre Norkorea i Merka, i danki na su esfuersonan sinsero, nos lo ta kapas di kompletá e preparashonnan pa e kumbre históriko”, asina Kim a bisa na Lee atraves di un intérprete.
Kada movishon di e lider norkoreano ta na su reunion ku Trump djamars lo wòrdu sigui pa kasi 3.000 periodista ku a desplasá pa Singapore i asina kubri e evento. Esaki ta un refleho di gran interes na nivel mundial den e giro repentino di Kim pa diplomasia den último lunanan, despues di ensayonan nuklear i ku misil di aña pasá ku a derivá miedu nan serio di guera.
