Presidente kolombiano, Gustavo Petro, ta kanta himno nashonal durante e “Marcha di Independensia i Demokasia” kontra di menasanan di presidente norteamerikano Donald Trump.
WASHINGTON (AFP).- Ayera e presidente norteamerikano, Donald Trump, a papia pa promé biaha na telefòn ku e presidente kolombiano, Gustavo Petro, i a invitá esaki pa un bishita na White House den “un futuro próksimo”, segun e mandatario a skibi riba Truth Social. “Tabata un gran honor di por a papia ku e presidente di Colombia, Gustavo Petro, kende a yama pa splika e situashon di droga i otro desakuerdonan ku nos tabatin. “M’a gradisié pa su yamada i su tono, i ta spera di por reuní kuné den futuro serkano”, segun Trump den su mensahe. “Ta hasiendo e areglonan entre e sekretario di estado Marco Rubio i e kansiyer kolombiano. E reunion lo tuma lugá na White House”, segun el a agregá.
Ayera Petro a konvoká marchanan rònt Colombia den rechaso dje menasanan di Trump, kende a akus’é – sin prueba – di ta un lider di trafikashon di droga i a bisa ku lo ta algu “bon” pa realisá un atake militar riba suela lolombiano manera tabata e kaso na Venezuela.
Petro a bisa ku el a prepará pa un diskurso “bastante duru”, pero ku despues dje yamada di un ora largu el a kambia esei. E mandatario kolombiano mas aleu a duna di konosé di a hasi un solisitut na e presidente norteamerikano pa “restablesé komunikashon dirèkt entre kansiyernan i presidentenan” di ámbos nashon. Tambe nan a papia riba narkotráfiko i e situashon na Venezuela, despues dje bombardeo di djasabra último.
Na e momento aki no tin fecha pa e enkuentro, na kua e presidente kolombiano a bisa di lo asistí. “Nan a logra na konvensé Trump ku ami tabata e rei di fábrika di kokaina… Trump no ta bobo”, el a bisa.
Petro i Trump na vários okashon a klèsh ku otro riba temanan di narkotráfiko, impuesto riba produktonan i migrashon. Colombia i Merka, aliadonan militar i ekonómiko históriko, ta den e momentonan di mas malu di nan relashon bilateral.
