…E presidentenan (d.r.p.d.) Trump (Merka), Zelenski (Ukrania) i Putin (Rusia) kendenan lo tin ku start kòmbersashon pa yega na pas, ounke ta parse ku Donald Trump no ta poniendo masha atenshon na Zelenski. Vários pais europeo a pone bon kla ku no por papia di pas sin envolví Zelenski…
WASHINGTON (AFP).- Presidente norteamerikano, Donald Trump, ayera a yega na un akuerdo ku Vladimir Putin pa start negosashon “inmediato” pa pone fin na e kasi tres añanan di guera den Ukrania i pa reuní ku su kolega ruso.
“Lo e bini aki òf ami ta bai aya i kisas nos reuní na Arabia Saudita”, segun Trump a deklará na periodistanan.
Tambe el a pronostiká ku “den futuro no muchu leu” lo pone fin na e guera den Ukrania i a konsiderá ku entrada dje pais aki den OTAN, solisitá pa Kiev pero rechasá pa Mosku, lo no ta funshonal.
Na opinion di Trump, Ukrania mester di elekshon. “Esaki mester a tuma lugá den mart di 2024 pero e lei marsial, na vigor for di febrüari di 2022, a impedí selebrashon di elekshon.
Rusia i Merka awor dirèkt lo start ku negoshashon, segun e presidente norteamerikano riba Truth Social, kaminda el a bisa di a sostené “kombersashon largu i hopi produktivo” ku Vladimir Putin.
Trump a informá e presidente ukraniano, Volodimir Zelenski, dje reuion en kuestion.
“E kòmbersashon a kana bon. E, meskos ku presidente Putin, ke logra e pas”, segun Trump. El a agregá ku Zelenski mañan lo reuní ku e vise presidente norteamerikano J.D. Vance i e hefe di diplomasia Marco Rubio, na Munich.
Ministernan di Relashonnan Eksterior di Spaña, Alemania i Fransia a bisa ayera na Paris ku ningun desishon por keda tumá riba Ukrania “sin Kiev” i sin e partisipashon di europeonan.
