WASHINGTON,USA.- E presidente norteamerikano, Donald Trump, a bisa ayera ku e impuesto di 25% pa Canada i México, anunsiá na kuminsamentu di febrüari pa motivá nan pa kombatí migrashon ilegal i tráfiko di fentanilo i ku a keda suspendé pa un luna, ”ta sigui padilanti”.
“E plan di impuesto ta sigui puntualmente i segun a keda programá”, segun Trump a bisa den konferensia di prensa na White House huntu ku e presidente franses, Emmanuel Macron.
Canada i México ta negoshá un akuerdo pa evitá e tarifanan di duana ku nan sosio dje tratado di komersio liber T-MEC, na momento ku awe ta ekspirá e periodo di un luna ku Trump a duna pa yega na un solushon.
Ayera e presidente di México, Claudia Sheinbaum, a bisa di ta spera ku pa djabièrnè awor tin un akuerdo.
“Nos ta mek riba djabièrnè awor pero si ta nesesario lo mi buska un otro yamada telefóniko ku presidente Trump. “Lo mi hasi e loke falta pa yega na un akuerdo”, segun e mandatario mehikano den konferensia di prensa.
Tantu México komo Canada a tuma medidanan pa komplasé nan bisiña.
Mexico, por ehèmpel, a manda 10.000 militar na e frontera komun pa para e tráfiko di droga pa Merka, ku ta pais kaminda mas di 80% di eksportashon mehikano ta bai.
