Merka i Israel ta sigui ataká Iran, pero awor ku un Donald Trump furioso. E ke mira ku otro paisnan ta yuda bombardiá Iran.
WASHINGTON (AFP).- Donald Trump ayera a deskartá e posibilidat di un akuerdo pa stòp e bombardeo di Iran, konsiderando ku Washington ta hiba un bentaha den e guera ku ya ta dura tres siman. “Mi no ke stòp e guera. Bo no ta para un guera na momento ku literalmente bo ta kabando ku e kontrinkante”, segun Trump a bisa na periodistanan den White House.
E mandatario a sigurá ku e meta di Merka, meskos ku ta e kaso ku Israel, ta e “viktoria” i a agregá refiriendo na Iran: “Nos ta gòlpiando nan teriblemente fuerte. Mi ta kere ku no ta posibel pa nan risibí mas gòlpi”.
Promé ku esei, Trump riba su plataforma Truth Sosial a ataká su aliadonan “kobarde” di OTAN pa a nenga na partisipá den e esfuerso pa liberá e paso marítimo via dje kanal di Ormuz. “Sin Merka, OTAN ta un tiger di papel. Nan no ke a uni den e pelea pa para un Iran ku ta kargá ku arma nuklear. “Awor ku e bataya militar ta ganá, ku kasi nada di peliger pa nan, nan ta keha dje preis haltu di petrolio ku mester paga, pero nan no ke yuda pa habri e kanal di Ormuz. “Kobardenan, nos lo rekordá nan”, el a agregá.
“Ningun forsa na tera por derotá marina norteamerikano ni e ehérsito norteamerikano”, segun el a bisa mas despues.
Den último tempu e presidente a dòbel su deklarashonnan kontradiktorio riba durashon potensial dje guera, primintiendo tin biaha ku e fin ta hopi serka, pero na otro okashon ta bisa ku ehersito norteamerikano no tin purá pa kaba ku e guera. E último señalnan no ta mustra den un konklushon rápido.
Mientras tantu, tin informashon ta bisa ku presidente Trump i su gobièrnu ta buskando pa poderá nan mes dje isla di Jark, kaminda ta sali den kareda di 90% dje eksportashon di krudo di Iran, ku e meta pa obligá Teheran pa habri bek e anal di Ormuz
