Por mira huma ta sali for di kaminda Israel a tira bòm sùit di Líbano na Dayr Seryan ayera
TEHRAN, IRAN, AFP.- Presidente merikano Donald Trump lo sòru pa un fièrnu kontra Iran si e no aseptá un akuerdo pa terminá ku e guera, asina Kas Blanku a bisa ayera, aunke no a sigurá ku e kòmbersashonnan lo kontinuá apesar di e rechaso di e iranínan pa e plan proponé pa Washington.
“Si Iran no aseptá e realidat di e momentu aktual, si e no komprendé ku el a keda derotá militarmente, presidente Trump lo sigui ku e lo haña e gòlpi di mas duru ku niun a haña promé”, asina e bosero di Kas Blanku Karoline Leavitt a bisa.
“Presidente Trump no ta hasi wega i e ta preparando pa desatá un fièrnu. Iran no mester ekiboká su mes atrobe”, asina el a sigui bisa i a añadí ku “e kòmbersashonnan ta kontinuá”.
Oranan despues e kansier iraní Abas Araqchi a indiká ku e repúblika islámiko no tin intenshon di negoshá pero e lo sigui resistí.
Ku Merka “Ta papia di negosiashonnan awor ta un rekonosementu di derota” pa parti di Washington, asina e hefe di diplomasia iraní a bisa den deklarashonnan na televishon estatal, i a insistí ku Tehran ke pone fin na e guera ku su propio kondishonnan.
Segun prensa, míles di trupa merikano por keda mandá pa Medio Oriente, i Iran a menasá pa dirigí su mes riba e nabegashon den laman Kora si Merka sòru pa un invashon na tera.
Fo’i kontròl
Sekretario general di ONU Antonio Guteres a atvertí ku e guera ta for di kontròl, miéntras tabata yega reportahenan di bombardeo na Iran, Israel, Líbano, Bahrein, Kuweit, Hordania i Arabia Saudita.
Marina iraní a afirmá ku nan a tira misilnan di krusero kontra portavionnan merikano Abraham Lincoln i a atvertí ku por surgi mas atake di e tipo aki.
Israel a afirmá ku el a sòru pa bombardeonan na Tehran i na Isfahan den sentro di e pais.
Hendenan ta den kampamentu despues ku nan mester a bandoná na kas. Aki nan a bai kamper den un área di parker na kosta di Beirut
