WASHINGTON, USA (AFP).- E kandidato republikano pa presidensia di Merka, e magnate Donald Trump, a bisa ku si e pèrdè elekshon di novèmber próksimo lo e no bolbe presentá su mes den 2028, segun entrevista publiká ayera.
“No, mi no ta mira mi. Mi ta kere ku esaki lo ta tur kos. Mi no ta imaginá mi en apsoluto komo kandidato den 2028”, segun e eks-presidente di 78 aña riba un pregunta den e programa Full Measure.
Trump a bisa ku, sinembargo, e ta spera di lo tin éksito dia 6 di novèmber awor. E republikano ta den un ‘race’ kabes-kabes kontra e kandidata demokrat Kamala Harris, inkluso den e estadonan klave kaminda probablemente e elekshon lo keda disidí.
Partido Demokrat a mira su apoyo lanta bèk despues ku presidente Joe Biden, di 81 aña, a retirá dje ‘race’ despues di un desempeño hopi malu den un debate na televishon kontra di Trump.
Trump a pèrdè kontra di Biden den 2020, pero a nenga na aseptá e derota i a insistí riba e idea ku a “hòrta” e elekshon for di su persona, ademas di diferente otro teoria di konspirashon.
