Presidente norteamerikano Donald Trump den konferensia di prensa ayera tardi. E presidente mes ta skohe kua ta e medionan di komunikashon sosial ku por asistí na su enkuentronan ku prensa.
WASHINGTON (AFP).- E presidente norteamerikano, Donald Trump, ayera a duna di konosé ku ta resultá “mas fásil atendé ku Rusia kompará ku Ukrania” pa por pone fin na e guera i ku e tin konfiansa den e presidente ruso Vladimir Putin.
“Ami ta kere loke e ta bisa”, segun Trump den konferensia di prensa den White House.
“Ta resultá mi mas difísil pa trata ku Ukrania i nan no tin e kartanan den man”, segun e merikano. “Ami ta kere ku sigur ta mas fásil pa atendé ku Rusia”, el a agregá.
Merka a oumentá e preshon riba Ukrania, parando asistensia militar i di inteligensia pa Kiev.
Apesar ku ayera el a menasá ku sanshonnan kontra di Rusia, Trump a bisa di por komprendé e motibu pakiko rusonan a bombardiá Ukrania den oranan di anochi.
“Pa bisa bèrdat, mi ta kere ku nan ta hasiendo loke ku kualke otro hende den nan posishon lo a hasi na e momento ei”, segun Trump a bisa.
“Semper mi tabatin un bon relashon ku Putin. I bosnan sa kaba, e ke pone fin na e guera”. “Mi ta kere ku e ta mas generoso di loke e mester ta i esei ta bastante bon. Esei ta nifiká hopi kos bon”, segun e presidente merikano a agregá.
E presidente ukraniano, Volodimir Zelenski, ta purba na haña garantianan di seguridat oksidental promé ku yega na un paro di hostilidat ku Rusia.
“Mi no sa si nan ke yega na un akuerdo. Si nan no ke yega na un akuerdo, nos lo laga nan pa nan kuenta pasobra nos si ke un akuerdo. Mi ta hasi esei pa para e matansa”, segun Trump a deklará.
