China ta akusá Merka di dòbel moral na momentu ku presidente Trump a menasa ku tarifa adishonal di 100%
WASHINGTON, MERKA, AFP.- Presidente Donald Trump a deklará ayera ku Merka ke yuda China i no perhudiká, adoptando un tono mas trankil dianan despues di a anunsiá tarifanan adishonal di 100% riba e di dos ekonomia mas grandi di mundu.
E deklarashonnan di Trump di siman pasá, meskos ku e menasa di kanselá un reunion ku su homólogo Xi Jinping fin di e luna aki, a pone ku akshonnan di Wall Street a kai riba tereno negativo, ku e operadornan preokupá pa un posibel re inisio di e guera komersial entre Washington i Pekin.
“Bosnan no wòri ku China, tur kos lo ta bon. E respetabel presidente Xi a kaba di pasa den un mal momentu. E no ke un depreshon pa su pais i ami tampoko”, asina e mandatario merikano a bisa riba su plataforma Truth Social.
Trump a kuminsá bek ku e guera komersial ku Pekin djabièrnè pasa i den un disputa riba restrikshonnan nobo di China riba eksportashonnan di mineral.
E gobernante merikano a anunsiá tarifanan adishonal i kontrol di eksportashon riba software di importansia stratégiko, kual lo drenta na vigor 1 di novèmber.
Pekin di su parti a akusá Washington di aktua inhustamente. E ministerio di komersio chines a kalifiká e menasa di tarifa di Trump komo un típiko ehèmpel di dòbel moral.
