NEW YORK, AP.- Un hues di New York a duna presidente Donald Trump òrdu pa paga 2 mion dòler pa resolvé un demanda kaminda e ta wòrdu akusá pa malversá fondonan di su organisashon karitativo pa benefisiá polítiko i ekonómikamente.
Hues Saliann Scarpulla Scarpulla a bisa ku Trump a violá su deber ku Fundashon Trump, permitiendo pa su kampaña plania un evento di rekoudashon di fondo pa karidat di veteranonan.
E evento, kual a pasa e plaka atraves di e fundashon di Trump a keda diseñá “pa benefisiá e kampaña polítiko di Trump”, segun Scarpulla.
Aparte di esaki, e hues a aprobá akuerdonan firmá luna pasá entre abogadonan di Trump i e fiskal general di New York pa klousurá Fundashon Trump i a aseptá pa paga 11.525 dòler bèk, kual el a gasta na eventonan deportivo i shampaña pa un gala di karidat. Ademas, el a aseptá e restrikshonnan di su partisipashon di kualkier organisashon karitativo.
E fiskal general di New York, Letitia James a elogiá e resolushon komo “un gran viktoria pa protehá nos fondonan karitativo i sanshoná esnan ku ta abusá di karidat pa hasi ganashi personal”.
