WEST PALM BEACH, FLORIDA, MERKA, AP.- E presidente Donald Trump a mustra na fabor di fortalesé revishonnan di antesedente penal pa esnan ku kier kumpra arma. El a hasi esaki miéntras e tabata pasando su fakansi den su kampo di gòlf privá den Florida algun mia leu di kaminda e masakre eskolar a pasa siman pasá.
E bosero Sarah Huckabee Sanders a bisa ku e mandatario a papia ku e senador republikano di Texas John Cornyn, pa determiná si por aprobá un medida bipartidista ku ta fortalesé e base di datonan di FBI pa esnan ku kier kumpra arma.
“Si e negosiashonnan kana bon i si konsiderá diferente opshon, e presidente ta sostené e esfuersonan pa mehorá e sistema di revishon federal”, asina Sanders a bisa den un komunikado.
Trump kende ta pasando fin di siman den su propiedat privá den Palm Beach, a inisiá su deskanso den e kampo di gòlf den serkania.
Durante fin di siman, Trump a pasa gran parti di su tempu ta wak notisia na televishon i kehando tokante e investigashon di intervenshon ruso den elekshon merikano.
E mandatario a publiká un kantidat di tweet desde Mar-a-Lago, kehando riba e investigashon i akusando FBI di ta demasiado opseshoná ku e tema ruso ku nan no a investigá e atakante di e skol na Florida manera mester ta. Na ningun momentu Trump no a papia di e sufrimentu di e famianan ni di e nesesidat di reforma leinan ku ta permití kualkier pa kumpra armanan di guera den Merka.
