WASHINGTON, AP.- Presidente Donald Trump a afirmá ku e lo no duna e asesor di Kas Blanku, Kellyanne Conway retiro, apesar ku un agensia federal a rekomend’é pa e hasi esaki. E agensia a bisa ku e asesor a violá un lei ku ta limitá sierto aktividat polítiko di empleadonan federal.

Trump a konfirmá ku el a wòrdu informá tokante e investigashon di Ofisina di Asesor Legal Spesial (OSC) djaweps, durante un programa di televishon ku Fox & Friends. “Segun ami, nan ta purbando di kita su derechi di libertat di ekspreshon i esaki no ta hustu”, asina el a afirmá.

OSC a bisa den un karta ku Conway a violá Lei Hatch, ekspresando su menospresio kontra kandidatonan demókrata presidensial durante entrevistanan na televishon i riba retnan sosial komo funshonario públiko.

OSC a determiná ku Conway a violá Lei Hatch durante dos entrevista na televishon kaminda e ta papia na fabor i kontra kandidatonan di elekshon spesial na Alabama na aña 2017.

Referiendo na Conway, Trump a bisa ku e simplemente “tin derechi di kontestá preguntanan”.

E bosero di Kas Blanku, Steven Groves, a bisa ku e desishon di e agensia “no tin presedente” i ta “profundamente robes”. El a agregá ku e akshon aki ta violá Conway su derechi di ekspreshon liber.

LAGA UN KOMENTARIO

Please enter your comment!
Please enter your name here